Adventist Hospital-ah naupang ward thar hawng

Aizawl Adventist Hospital-a naupang ward (paediatrics ward) siam thar chu, nimin khan Health minister Lal Thanzara'n a hawng.

Lal Thanzara chuan, naupangte hriselnain nghawng thui tak a nei a, chhungkua, khawtlang leh state economy din­hmun thlengin a khawih tih sawiin, "Ram chang­kang tehna pakhat chu Infant Mortality Rate (IMR) hniam a ni a, kum 2016 chhung khan nausen pianghlim 84 leh nau hringtu nu panga Aizawl Civil Hospital-ah thi an awm. IMR tihniam tur hian ṭan lak a ngai," a ti.

National Health Mission hnuaiah nau­pang inenkawlna kawngah hmalak mek zel a nih thu sawiin Health Minister chuan, "Sick Newborn Care Unit (nausen piang hlim damlo enkawlna bik) pawh khawpui leh district hmun hrang hrangah dah mek zel a ni," a ti a; tun dinhmunah Aizawla dam­dawi-in hrang hrangah khum 150 vel naupang tan a awm a, chu chuan mamawh a la phuhrûk loh thu a sawi.

Aizawl Adventist Hospital-ah hian khum 50 awmin, Intensive Care Unit (ICU) leh Neonatal Intensive Care Unit (NICU) changtlung tak a awm a; naupang dahna tur bik ward thar hi Rs. 8,70,000 senga sak a ni.