CSS Hindi zirtirtute'n thil phût nawr nan Tiam chin awm loin chaw an nghei ṭan

Mizoram CSS Hindi Teachers Association (MCHTA) member-te chuan, thla 10 chhung (February 2017 nen thla 11) hlawh an lak tawh loh lak an phût avang leh March 1, 2017 aṭanga an thawh hun (contract) tawp turah rawih chhunzawm phûtin nimin tlai aṭang khan chaw an nghei ṭan.

MCHTA hruaitute chuan nimin khan Aizawl Press Club-ah thuthar thehdarhtute an kâwm a; an dinhmun, an harsatna leh an phûtte sawiin, an thil phût nawn nan nimin tlai aṭangin chaw a nghei dawn thu an puang a ni.

MCHTA president Lalchung­lura chuan, CSS hnuaia Hindi zirtirtute chu February 18, 2011-ah appointment pek an ni tih sawiin, "Departmental Promotion Committee (DPC) kaltlanga dan ang thlapa lâk kan ni a, post siam fel tak neia lak kan ni. State sorkar pawhin keini mi 1,305-te hi Central sorkar nen guideline fel tak neiin min la a ni," a ti a; guideline-ah chuan Central-in a ṭanpuina a tawp hunah hna leh hlawha mawh­phurhna chu state sorkar kutah a awm tur thu ziah a ni tih a sawi.

Lalchunglura chuan, guidline chu sorkar laipuiin a sanction order apiangah tarlangin, Mizoram sorkar hnenah a hriattir ṭhin tih sawiin, "Hei hi state sorkarin hre reng chungin min ruai ngam a, CSS Hindi teacher-te chuan guideline behchhan hian kan state sorkar hian a duh phawt chuan a mawhphurhna lain min dah nghet theih tih kan hria a, kan chanvo dik tak (regularisation) min pe turin kan phût a ni," a ti.

MCHTA President chuan, September 30, 2013-a Chanmari YMA Hall-a conference an neih ṭumin, chutih laia School Education minister Lalsawta'n CSS Hindi zirtirtute chu sorkarin a enkawl zui zel a ngaih tur thu leh theihtawp an chhuah tur thu a sawi tih a sawi avangin, a thusawiah ding nghet ngam tura an beisei thu a sawi.

MCHTA President sawi danin, CSS Hindi zirtirtute'n hlawh an la ṭha lo ṭhin hle a, a chhan chu utilisation certificate leh document pawimawhte Mizoram sorkarin Central-a a pek tlai ṭhin vang a ni. Hlawh an lak loh rei avangin harsatna tam tak an tâwk a, chuti chung chuan sikul an ṭhulh phah ngai lo.

An duh leh mamawhte Mizoram sorkar hotute hnenah vawi tam tak an thlen tawh a; mahse, awmzia a neih loh avangin lungawi loh lantir nan pen down strike, mass casual leave leh kawngzawhte an huaihawt tawh.

February 23, 2017 aṭanga nimin thlengin chhun zan zawmin Chief Minister bangla luhna gate bulah an ṭhukhawm ṭhin a, mi 300-500 inkar vel zan thum an tlaivar tawh.

Lalchunglura chuan, an ngenna hrang hrangte'n awmzia a neih theih loh avangin nimin tlai aṭangin tiamchin awm loin hunger strike an nei dawn tih a sawi a, "Kan nu leh pate kan auh ei hma chuan kan nunnain a tuar dawn a nih pawhin he strike hi chawlhsan kan tum lo," a ti. CSS Hindi zirtirtute hian MacDonald Hill-a Teachers' Inn-ah chaw ngheiin an awm khawm dawn a ni.

Chief minister Lal Thanhawla'n, CSS Hindi zirtirtute chuan rawih an nih dawnah an hun tawp huna pawhsei theih an nih lohah leh an hun tawpah báng tawp tura an intiam thu a sawi chungchanga zawhna chhangin, MCHTA hruaitute chuan, "Intiamkamna kan ziak ngei a, ziak lo thei loin min siam a ni," an ti a; an contract tawp hunah báng nghal tur an ni tih an hria a, mahse, Central guideline a awm avangin dah ngheh an phût tih an sawi.

CSS hnuaia Hindi zirtirtute hian thla khatah Rs. 29,000 an hlawh a, an hlawh atan thla khatah cheng nuai 377 vel sên a ngai. CSS Hindi zirtirtu zat chu mi 1,305 anga sawi ṭhin ni mah se, báng tawh leh thi tawhte an awm avangin mi 1,295 nia an inhriat thu an sawi a; thawk tawh lote hmun ruakah sorkarin DPC kaltlang loin an mi duh zawngte an dah ṭhin nia an hriat thu an sawi bawk.

MCHTA Press Statement dang ṭhenkhat
1. Kum 2008-ah CSS hnuaiah Hindi zirtirtu 500 ban an ni tawh a, thawk tura lak tawh mi 687 chu appointment an pe duh lo.
2. Kum 2007 hnuah School Education department-ah zirtirtu general-ah a nghetin mi 1,012 lak an nih tawh laiin, Hindi teacher post ruak tam tak awm mah se, a ngheta lak an la awm lo.
3. Kum 2008 inthlanpuiah Congress party-in an manifesto-ah Hindi directorate hran siam a tiam a, tun thlengin a la tihlawhtling lo.
4. Hindi chauh ni lo, subject dang kan zirtir vek. Sikul kan kai loh avangin exam question set-ah leh paper check-ah mi dang a rawih a ngai a, common question siamin, DEO leh SDEO aṭangin a sem.
5. Min duh lo a, kawng lakah thi mai tura min kalsan hreh lo a nih chuan, keini pawhin theihtawpin kan dam khawchhuah theih nan ṭan kan la zel ang.