District plan siam dan tur sawiho

Lunglei District Planning and Monitoring Committee chu nimin khan Lunglei DC K Lalrohlua hoin a pisaah an ṭhukhawm a, kum 2017-18 atana district plan siam dan tur an sawiho.

Meeting-a tarlan danin, Ministry of Tribal Affairs aṭangin Lunglei district tan cheng nuai 411.04 ruahman a ni a; sum hi tribal-te chawikanna tur a nih angin, member tinte mahni department hmalak dan tur, Tribal Sub Plan (TSP) siam ṭheuh tura tih an ni. TSP-te chu March 1, 2017 aia tlai loa thehluh tur a ni.

District Planning and Monitoring Committee hi India Constitution Article 275(1) behchhana din a ni a, tribal-te dinhmun chawikanna atan district plan siam ṭhin.

Committee nodal dept chu Social Welfare a ni a, Health, School Education, Commerce & Industries, Agriculture, Horticulture, AH&Vety leh Fisheries dept-te chu member an ni.

District plan hi District Planning Committee-in a pawmpui hnuah state level-a ennawn leh tur a ni.