Internet ṭhat theih dan tur sawiho

Serchhip DC Dr Lalro­zama hoin nimin khan a pisaah, sorkar official leh Serchhipa BSNL hotute'n an district chhunga internet chak zawk leh changtlung zawk a awm theih dan tur an sawiho.

Dr Lalrozama chuan, internet tel loin sorkar office-te'n hna an thawh hleih theih tawh loh thu sawiin, "Hmasawnna hnathawh tam tak hi internet hmanga state thuneitu sang zawk leh central thuneitute thlenga online-a inbe chunga thawh a ni deuh vek tawh. Hei vang hian district chhung hmun ṭhenkhata internet lama harsatna kan tawh ṭhinte rang taka kan siam-ṭhat a ṭul," a ti.

BSNL SDE Mohan Sethi chuan, Serchhip district chhunga BSNL dinhmun tlangpui a tarlang a; mobile tower 12 a awm mek thu leh pahnih siam belh mek a nih thu a sawi.

Serchhip DC chuan, BSNL office-te'n high speed internet an pe chhuak mek nia sawi a nih laiin, office ṭhenkhat internet la hmang hleithei lo an awm avangin, harsatna awmte sutkian nghal a nih theih nan broadband connection line zawng zawngte en ṭha nghal turin BSNL thawk­tute chu a ngen a; a ṭul anga anmahni puibâwm turin SDC Vabeimozachhi Chozah a ruat nghal a ni.