KHAWTHLIR

Assembly Session
March 14 aṭanga ṭan tur Mizoram Assembly Budget Session chuan March 30 thleng a awh ang. Business Advisory Committee-in a duan danin session ṭan niah Larsapin thu a sawi ang a, March 16 ah Finance Minister-in kum 2017-2018 atana Mizoram budget tura ruahman a pharh ang.

Mizo ngei dawr duh
NGO Co-ordination Committee nimina CYMA pisa-a ṭhukhawm chuan, sumdawnna kawnga Mizote chimrala kan awm lohna tur leh Mizo sumdawngte kan inenfiah fo theih nan, Mizo mipuite fimkhur tur leh hnam rilru pu thiam a, mahni Mizo puite ngei dawr ṭhin turin an ngen.

Super specialist
Dr Zosangzuala s/o JC Siamliana, eye specialist chuan Susrut Eye Hospital aṭangin February 24, 2017 khan Super Speciality in Vitroretinal Surgery a zo a; Mizoram aṭanga mit (retina) zai lama super specialist hmasa ber nia thu dawn a ni.

Thiin hmu
Nimin chhun dar 12:30 vel khan Kolasib Hmarvengah taxi MZ-01 F-7582 chhungah Ramtlanmawia s/o C Parliana, Ramhlun North thi a hmuh a ni. Thu dawn danin, taxi hi Ramtlanmawia ta a ni a, a taksaah hliam hnuhma a awm. Ramtlanmawia'n a taxi-a a chuanpui mi palite chu Kolasib Police-te'n thu zawhfiah atan an man.

Tlân phal lo
Traffic SP chuan thupek chhuahin, March 1-8, 2017 inkarah Zohnuai road, Vaivakawn kawngpui dungah SIPMIU-in hna an thawh dawn a vangin zan dar 6 aṭanga zing dar 5 inkarah lirthei tlan phal a nih dawn lo tih a tarlang.

Fitness centre
Aizawl West College-a Fitness Centre siam thar chu nimin khan Mizoram State Sports Council secretary C Laltlanthanga'n a hawng. Fitness Centre hi University Grant Commission aṭanga an sum hmuh cheng nuai 19 hmanga an siam a ni.