MBOCWWB kan chhui zel dawn : Lalduhoma

ZNP president Lalduhoma chuan, Mizoram Building and Other Construction Workers Welfare Board (MBOCWWB) sum hman dik loh hai lannaa a bultumtu chu ZNP ṭhalaite niin a sawi a, "Kan sa hliam a ni a, a hnu hi kan chhui zel dawn," a ti.

Nimina ZNP pisaa inkhawmah thu sawiin Lalduhoma chuan, Chief Minister-in LEIT Minister leh MYC Chairman-te chu Chief Minister a nih chhung chuan an báng dawn lo tih a sawi tawh tih a sawi a, "Tunah an bânna a pawmsak leh tâk si avang hian an lo tisual ngei tih CM hian a nemnghet a ni," a ti a; zirlai awm ṭha duh lo tia a sawi hnenah sorkarin Rs. 1,21,000 a pek thu leh zirlai dangte'n zangnadawmna cheng nuai 131 an la phût mek thu a sawi.

Lalduhoma chuan, 'CM hi mi dangte bànna pawm tlak a ni bik em ni' tih chu mipui zawhna a nih thu sawiin, "Media hrang hranga a lan danin, he fund hmang dik lo hmasatute zingah CM ngei hi a tel ve tlat a ni," a ti.

Kum 2013 inthlan dawn ṭêpah CM Lal Thanhawla bial Serchhipah leh Thenzawlah mi 760 hnenah MBOCWWB sum Rs. 26,34,000 sem a ni tih sawiin, "A mak lehzualna chu, an vai hian ni khat thil thuah, October 4, 2013 khan an dawng rual vek thei kha a ni," a ti.

ZNP President chuan, I-League khelhna, Rajiv Gandhi Stadium panna kawngah I-League khelh nia traffic jam nasa lutuk ṭhin leh stadium-in mipui a dâwl zo lo lutuk chu vei tham a nih thu a sawi a, "ZNP a sorkar chuan kawngpui hi kan zauh ang a, stadium pawh hi mihring nuai khat lengin kan siam ang,” a ti.

Lalduhoma chuan, CSS hnuaia Hindi zirtirtute'n kum khat dawn hlawh an la lo chu an lainat tak zet thu sawiin, "Mizoram sorkarin utilization certificate a thehluh tlai vang nia sawi hi thu dik a nih chuan sorkar hian mawhphur ngamin, mipui hriat turin chhui chiang se kan duh," a ti a; CSS Hindi teacher-te chungchanga kum 2013-a minister Lalsawta'n a lo sawi tawh chu sorkarin a tihpuitlin ngei an bá niin a sawi.