Faina lama hmalaknate sawiho

Mizoram State Sanitation Task Force chu nimin khan UDPA secretary Vanlalramsanga hoin ATI conference hall-ah an ṭhukhawm a, faina lama hmalakna kal mek ‘Action Plan for Cleanliness Drive’ an sawiho.

UDPA Secretary chuan Mizoram chhunga faina beihpui thlak mek chu Mizoram sawrkar hmalakna thar New Economic Development Policy (NEDP) hnuaia Climate Change Mitigation Strategy-a component pawimawh tak a nih thu sawiin, "Mizoram hi India rama state fai ber ni tura a inpuahchah nan action plan-te hi siam a ni," a ti.

Sawihonaah hian kum 2016-2017 (March-May 2017) chhunga faina chungchanga Mizoram puma hmalak tawhte leh kalpui tur hmachhawpte sawi a ni. Chung zingah chuan kawr leh lui te thenfai lamah nasa taka ṭan lak Task Force chuan a rel a, hetiang thenfai hna ṭha taka district hrang hranga thawh a nih theih nan adventure, sports leh youth club-te bakah local council/village council-te ṭanrualpui an tum a ni.

Hmun ualau laiah leh sikul, college leh university campus-ahte mitla ngei tur ‘prominent hoarding’ tar te, Swachh Bharat Mission hnuaia swachhagrahis nena thawhho te, social media hmanga thu theh­darh te, print media cen­tralized a kalpuite leh hmun pawimawh lai leh mihring bitna lai hmunah bawlhhlawh bawm dahte meeting chuan an rel a ni.