Sports Minister-in stadium sak mek a tlawh

Lungleia State Sports Academy, Lena Stadium, SAI Extension Centre leh Sazaikawna Multipurpose Sports Complex-te chu nimin khan Sports & Youth Services minister Zodintluanga'n a tlawh a, hna thawh dan a enfiah.

Zobawka State Sports Academy sakna tur sum hi Ministry of DoNER aṭanga hmuh niin, kum 2012-ah siam ṭan a ni a; Value Added Tax tihsan avangin hna chawlh lailawk a ni. Kumin January aṭang khan hna an thawh chhunzawm leh tawh.

Academy-ah hian hostel (mipa leh hmeichhe tan), football leh hockey khelmual, badminton court, basketball court, tennis court, volleyball court, archery leh shooting range bakah, contact sport khelhna tur indoor stadium a awm dawn a ni.

Sports Minister hian Electric Venga SAI Extension Centre a tlawhnaah rock climbing wall siam zawh thar chu a enfiah a, cheng vbc. 6 senga Saiza­kawna Multipurpose Sports Complex hnathawh kal mek te enin, a thawktuten kumin chhung ngeia peih hman an in beisei thu an lo hrilh a ni.

Hei bakah hian Serkawn, Melte rama Lena Stadium sak mek, cheng vbc. 24.18 senna tur chu a tlawhnaah Zodintluanga chuan thawktute tha tichak tura venpui turin Serkawn mipuite a chah a ni.