HSLC top 10-te chawimawina hlân ; Tih tur hmabak kan la ngah - CM Zorama

MZP chuan nimin khan Vanapa Hall-ah High School Leaving Certificate (HSLC) Examination 2022-a Mizo zirlai top 10-a langte chawimawina an hlan a; khuallian chief minister Zoramthanga chuan, Mizoramin bul a ṭan har avangin tih tur hmabak a la ngah thu a sawi.

Chief Minister chuan, Mizoram chu rambuaia a luh hnuah kawng hrang hrangin a chhiat vek thu sawiin, "Kum 1986-ah bul kan ṭan dék dék a, a keh them nawi tê tê chharin kan kal cho a ni. Ṭhenawm state-te chu bul kan ṭanin khítah an awm tawh a, a hnufual ve awm chhun chu Arunachal Pradesh an ni mai," a ti.

Zoramthanga chuan, Mizoramin hmabak a la ngah thu sawiin, "Tunah chuan chief secretary turah pawh kan thu tlat lo a, AGMUT cadre-ah min dah a, Ministry of Home Affairs thu thuin kan awm. Arunachal Pradesh nen an duh duhin min sawp a ni," a ti a; ṭhenawm state dangte'n cadre hran an neih avangin CS atan an duh duh an dah theih thu a sawi.

Chief Minister chuan, Mizoramin hmasawnna tur a la ngah thu sawiin, "Tih tur, hna leh hmin tur kan ngah. Heng zawng zawngah hian zirlaite pawhin tih tur kan nei vek. Raltiang i kai ve ang u. Politics, economy, society leh development-ah tih tur kan ngah," a ti.

Pathianin Mizoramah malsawmna ropui tak a dah thu sawiin CM Zorama chuan, "Ram danga awm lo, huan lo ram neih theih a tam. Pathianin malsawmna a hùnin min rawn hùnsak a, a bak chu chhunzawm turin min ti a ni," a ti a, hmabakah chona ropui tak a awm thu a sawi.

Zoramthanga chuan zirlaite fuihin, "Sorkar hna ringawtin min daih lo ang. Sorkar hna ni loah hlawhtlinna tur tam tak a awm. Kan kalna apiangah chhawr tlak thiamna puak chhuah tum tur. Sorkar hnathawk hlawh lêt hlawh theihna a la awm ang, chu chu kan hmaah a inhawng a ni," a ti.

Chief Minister chuan, rilru tihnual lo tura zirlaite chahin, "Pathianin keimahnia talent ropui tak a dah hi inhrilh nawn fo a ngai. Kan thluaka talent min pek hi a hmang tam berin 10% pawh an hmang mang lo an ti," a ti a; Pathianin talent a pekte a ṭha zawnga kalpui a nih phawt chuan hlawhtlinna an chan ngei tur thu a sawi.

HSLC 2022 top 10-te chawimawina inkhawm hi MZP vice president Andrew F Lalramnghaka'n a kaihruai a, MZP president Lalnunmawia Pautu pawhin thu a sawi.

Zirlai chawimawina hlante chu mi 14 an ni a, pakhatna mi pahnih hnenah Rs 10,000 hlan niin, mi dang zawng hnenah Rs 5,000 hlan a ni. Pawisa bakah thuchei leh lehkhabu pathum ṭheuh pek an ni bawk.