Mizoram Pollution Control Board (MPCB) chuan nimin khan national high­way enkawltu Natio­nal Highways and Infrastructure Develop­ment Corporation Limited (NHIDCL) chu kawngpui an laihna leivungin lui a tihbawlhhlawh nasat avanga insawifiah tura hriattirna, show cause notice a pe a, ni sarih chhunga insawifiah turin a hriattir.
Thu dawn danin, MPCB chuan NHIDCL chu national highway an siamnaa an hnathawh tihtawpsak an nih lohna tur chhan leh environment an tihchhiat avanga zang­na­dawmna ṭhìn lohna tur chhan sawifiah turin an hriattir a; show cause notice a pek chhan ber chu kawngpui laihnaa leivûng an paih dan a mumal loh vang leh leivûngin lui a tihbawlhhlawh nasat vang a ni. 
Leivung paihin lui a tihbawlhhlawh chungchangah hian MPCB chuan complaint an lo dawng fo tawh a; MPCB pawhin NHIDCL chu an project awm dante MPCB-ah thehlut turin vawi hnih hriattir tawh mah se, NHIDCL chuan chhanna an pe ngai lo. NHIDCL hian Tuikhuahtlangah pisa an nei a, Mizoram hmun hrang hrangah kawngpui an lai mek a ni.&nbsp;NHIDCL leivûng paihin hmun hrang hranga lui a tihbawlhhlawh chungchangah hian MPCB chuan district bawrhsap tin hnenah lehkha thawnin, an huam chhung ṭheuhah C&D Waste Management Rules, 2016 kengkawh ṭha turin a ngen. MPCB hian December 10, 2021 khan DC tin hnenah lehkha a lo pe tawh a, May 23, 2022 khan a pe nawn leh bawk. MPCB chuan, NHIDCL leivung paih danah hmun hrang hrang aṭangin complaint an dawn thu tarlangin, DC-te chu an huam chhung ṭheuhah leivûng paih dan en uluk tur leh a ṭul anga hma la turin a ngen a ni.