Union Minister-in Larsap leh CM a kâwm

Zan thum riak tura Mizoram rawn tlawh mektu Railways leh Textiles changtu minister of state Darshana Jardosh chuan May 24, Thawh­lehni zan khan Governor Hari Babu Kambhampati leh chief minister Zoram­thanga te chu an chenna veve-ah a kâwm.

Darshana Jardosh leh Hari Babu Kambhampati hian Bairabi aṭanga Sairang thlenga rêl kawng siam mek an sawi dun a, siam zawh a nih hun chuan Mizoram tan a ṭangkai tur thu an sawi.

Governor chuan, Mizo­ramin handloom industry-ah theihna a neih ṭhat thu sawiin, "Puantah thiam tak tak Mizoram hmun hrang hrangah an awm," a ti a, textile industry lama ṭul leh mamawh awmah Mizoram pui turin Darshana Jardosh a ngen.

Union Minister leh CM Zoramthanga pawh­in Mizorama textile industry lama hmalak theihna tur leh rêl kawng chungchangte an sawi dun a ni.