Central Young Lai Association (CYLA) chuan Lawngtlai District Hospital-a doctor pali sawnna thupek sût leh specialist doctor pali dah belh tura an ngenna tihhlawhtlin phûtin nimin khan Lawngtlai leh Bungtlang South-ah sorkar pisa, bank leh zirna-ina kal turte an dang. Hetih lai hian, Health minister Dr R Lalthangliana chuan, loh theih lohin doctor-te sawn kual a ngaih thu a sawi.
CYLA hmalakna avang hian Lawngtlai DC chuan pisa a kai lo a, LADC chief executive member V Zirsanga leh executive member-te chuan pisa kal tum mah se, YLA duty-te ngenna avangin an kîr leh. Sorkar pisa, zirna-in leh bank-te khar vek an ni a; he thuziah lai thleng hian CYLA hmalakna avang hian thil duhawm lo thleng a awm lo.
Nimin vêk khan CYLA hruaitute chuan Lawngtlai Press Club-ah thuthar thehdarhtute an kâwm a; nunphung pangngaiah pawh district hnufual, doctor indaih lohna nasatna hmun an nih thu sawiin, "Myanmar buai avanga ráltlân mi 10,000 vel Lawngtlai district-in a kawl lai, doctor mamawhna a san zual laia doctor pali sawn chhuah an ni leh, mi dang pathum dah luh an ni hi district mipui zah lohnaah kan ngai," an ti. 
	 CYLA hruaitute chuan, an thil phût a hlawhtlin hma chuan an thiam dan ang anga hmalak zui zel an tum thu an puang a ni.&nbsp;Mizoram sorkar chuan May 20, 2022 khan Lawngtlai District Hospital-a doctor pahnih sawn chhuahna order a tichhuak a, May 23 khan Lawngtlaia thawk lai doctor pahnih dang sawnna order a tichhuak leh bawk. Hetih lai hian, doctor dang pathum, Lawngtlai District Hospital-a dahna order tihchhuah a ni. Health minister Dr R Lalthangliana chuan tun hnaiah doctor pension 10 chuang an neih thu sawiin, "Pension bakah hian zirna sang zawk zir tura kal 10 vel kan nei. Court case vangin doctor 20 dáwn lak tura tih pawh kan la thei rih lo a, PHC pariatah doctor an awm lo bawk nen, loh theih lohin doctor-te sawn kual an ngai a ni," a ti. Nimina Human Nutrition & Dietetics Society of Mizoram Annual Conference a hmanpuinaah Health Minister chuan, "Health department-a doctor leh post chi hrang hrang hnawhkhat turin hmalak a ni a, CM pawhin phalna min pe tawh," a ti a; doctor lak tum mek laiin Covid-19 a leng a, doctor lakna kalpui theih a nih tak loh thu a sawi. Health Minister chuan, doctor post ruak tam takte hnawh khat turin hma an lâk reng thu leh an harsatnate chinfel a harsat thu sawiin, "Tunah hian damdawi-in tam takah post eng emaw zat a ruak mek. PHC pariat ngawtin doctor an nei lo. Chuvangin, doctor sîksawi an ngai a, senior ṭhenkhat pawh hmun hla zawkah kan transfer hial a ni," a ti a; doctor nei lo khuaa mipui leh pawlte chu dawhtheihna nen an harsatna tawh mek hrethiam turin a ngen a ni.