Aizawl Assam Rifles insawntir dan tur Dy CM-in MHA Secretary a sawipui

Deputy chief minister Tawnluia chuan May 24, Thawhlehni khan Ministry of Home Affairs (MHA) secretary Ajay Kumar Bhalla chu New Delhi-a a pisaah a kâwm a, Aizawl khawpui lailia Assam Rifles awmte Zokhawsanga insawntir dan tur a sawipui.

Sorkar thuchhuah tarlan danin, Ajay Kumar Bhalla chuan, Assam Rifles-te Aizawl khawpui aṭanga an insawn chhuahna turin engkim peih a nih tawh thu a sawi. Assam Rifles lamin insawn tura remchan lohna an neihte enfel turin Deputy CM Tawnluia chuan MHA huaihawtin Aizawlah ṭhutkhawm a rawt a; MHA Secretary pawhin rawtna chu ṭha a ti a, kumin June thla chhungin ṭhutkhawm a nih tur thu a sawi a ni.

Tawnluia chuan, Smart City hnuaiah Lammual bula Laldenga Cultural Centre sak tum chu ṭan hma a ngaih thu a sawi a; MHA Secretary chuan ṭan nghal theih a nih thu a lo hrilh niin sorkar thuchhuah chuan a tarlang. Laldenga Cultural Centre atan hian Smart City hnuaiah cheng vbc. 1,000 ruahman a ni.

Deputy Chief Minister hi Home department secretary H Lalengmawia leh Delhi Mizoram House-a additional resident commissioner Alexander V Chongthu ten an ṭawiawm a ni.