Larsapin MRB Electric Branch a hawng

Mizoram Rural Bank (MRB) branch 100-na, Electric Veng Branch chu nimin khan Governor Dr Hari Babu Kambhampati-a'n a hawng.

Governor chuan, MRB chu Mizorama bank inzár pharh zau ber leh loan pek tam lamah leh PM scheme-tea hmalakna tihhlawhtlin kawnga hma hruaitu a nih thu sawiin, bank-te chu PM scheme hrang hrang tihhlawhtlin kawnga mawhphurtu lian tak an ni tih hriaa hma la zel turin a chah.

Hari Babu Kambhampati chuan, Mizorama bank hrang hrang hotute a kawm tawh thu sawiin, "Mizoram mipui nuai 12 chuangah chhungkua nuai thum vel awm angin kan chhût a nih chuan chhungkaw tinah bank account pakhat zel a awm niin a ngaih theih a, Mizoram hi financial inclusion bikah chuan India rama a ti ṭha pawl tak a ni tih a tichiang," a ti a; financial literacy, digital transaction leh online kaltlanga sumdawnna lamah hmasawn tum zel a ṭul thu a sawi.

MRB chairman V Jaya Chandra chuan, MRB chu Mizorama bank inzár pharh zau ber leh India hmarchhak biala regional rural bank zingah district leh RD block zawng zawnga branch nei awm chhun a nih thu a sawi a; MRB la dawr lote pawhin MRB dawr ngei se a duh thu sawiin, "MRB hi Mizorama chêngte pual liau liaua din, sum hmuhte pawh hmun danga luang ral ve ngai lo a ni," a ti.

MRB branch thar hawnna inkhawm hi general manager Samuel L Warbah-a'n a kaihruai a; MRB Electric Veng Branch chu Micro, Small and Medium Enterprise (MSME) pual tur a nih thu te, branch dinna senso atan cheng nuai 25 vel sên a nih thu leh, tunlai khawl ṭha ber ber hmanga thuam a nih thu a sawi.