Health department-in doctor indaih loh chhan an sawifiah

Health & Family Welfare department chuan thuchhuah siamin, HFW department-a thawktu indaih lohna avanga harsatna tawh mek chungchang an sawifiah a; doctor post ruak tam takte hnawh khat tura sorkarin hma a lâk reng rualin, harsatna chinfel a harsa hle niin an tarlang.

HFW secretary R Lalramnghaka hminga thuchhuah chuan, Mizoram sorkarin health sector tihchangtlun a ngaih pawimawh avangin kum 2019 aṭangin HFW department-a doctor leh post chi hrang hrang hnawhkhat turin hma a la niin a tarlang a, “He hna lak tur atan Chief Minister pawhin phalna min pek vek tawh laiin, Covid-19 hripui a rawn thleng a, hna lak kalpui theih a ni ta lo,” a ti.

Tun hnaiah Finance leh DPAR phalnain doctor 20 dáwn lâk tum a nih laiin, court case avangin tih chhunzawm theih a ni ta lo tih sawiin, “Hei hian harsatna nasa tak min thlen ta a ni,” a ti a; PHC leh hospital hrang hrangah doctor indaih lohna a nasa em em a, tun anga doctor indaih lohna leh harsatna hi Mizoramah a la thleng zen zen ngai lo niin an tarlang.

Health department thuchhuah tarlan danin, tun hnai thla ruk kal ta chhungin superannuation pension-in doctor 10 chuang an chhuak a, zirna sang zawk chhunzawm turin doctor thawk lai 10 chuang an chhuak bawk.