Congress sorkar laiin health care bill ba tling khawm a awm ve lo - MPYCC President

Health Care Scheme (HCS)-ah bill cheng nuai 70 chuang a tàn mek avangin Mizoram Pradesh Youth Congress Committee (MPYCC) hruaitute chuan nimin khan Mizoram State Health Care Society pisa an tlawh. MPYCC president Dr Lalmalsawma Nghaka chuan, Congress sorkar laiin mipui hnenah bill pe thei loa bat tling khawm a awm ve loh thu a sawi.

Congress ṭhalai hruaitute hian MSHCS-a thawkte chu HCS bill cheng vbc. 71 chuang táng mek avanga mipuiin harsatna an tawh nasat dante an sawipui a; sorkarin damlote pawisa bill a bat zat hi MPCC secretary Lalhruaitluanga Bawitlung-in RTI Act hmanga a zawhna chhannaa a lan danin, April 30, 2022 thlengin bill bá Rs 71,21,84,104 a awm a ni.

MSHCS pisaa thawkte chuan, theihtawpin bill táng mekte an ûm zui a, Finance leh Planning-ah an nawr reng a, mahse, sum harsatna avangin hmasawnna a awm hlei thei lo tih an lo hrilh niin MPYCC chuan an tarlang.

MPYCC President chuan, Congress sorkar hun tawp lam, December 2018 khan HCS sum báwmpuia sum tling khawm chu vbc. 155 a tling hman tih sawiin, "Mipui hnena bill pek theih loh bat khawl a awm ve lo," a ti a; HCS-a bill tang mek cheng vbc. 71 chuang chu a rang lama chingfel turin sorkar an phût tih a sawi.

Dr Lalmalsawma chuan, Mizoram budget a pung zel a, chhiah hrang hrang aṭanga sorkara sum lut pawh naménloa nasain a pung mek tih sawiin, "Mipuiin an himna atan health care-a an in register thlap hnu leh premium-te pe a, anmahni lama an tih tur tifel vek chunga hun rei tak an bill a táng hi a vanduaithlak hle. Harsatna nasa tak an tawh phah hi a pawi kan ti hle a ni," a ti.

Congress Ṭhalai President chuan, Planning leh Finance department-te pawh an mangang tih an hriat thu sawiin, "Non-plan expenditure sang lutuk vang tih a chiang hle. Finance Minister, Chief Minister ni bawk hian Mizoram mipui min hlawhchhampui tih a chiang hle," a ti a; Mizoramin 'Titia distinction' ringawt ni lo, hna thawk thei tak tak tur CM a mamawhzia a tichiang zual tih a sawi bawk.