Leimin laka invên nan thupek chhuah

Aizawl District Disaster Management Authority (DDMA) chairman Dr Lalhriatzuali Ralte, bawrhsap chuan nimin khan leimin vanga chhiatna thleng thei laka invênna tur thupek a chhuah.

Aizawl DC chuan, Mizoram leilung nghet tâwk lo avang leh khawsakna leh chêtna hrang hranga fimkhur tâwk loh leh ngaihsam avangtein leimin a awm ṭhin tih tarlangin, “Leimin vanga chhiatnate hi hmun tam takah tui kal dan mumal loh vang a ni tih mithiamte hmuh dan a ni. Tui chhe paih dan dik lo te, tuidawn awm loh vanga tui pût ral te, side drain leh kawr hnawh vanga tuihâwk kawng bote hian lei a tinghet lo a, leimin a siam ṭhin,” a ti.

Aizawl Bawrhsap chuan, Disaster Management Act, 2005 hnuaiah a ṭul angin thupek kenkawh a nih tur thu leh thupek bawhchhiate hrem theih an nih thu a tarlang bawk.

AIZAWL DC THUPEK
1) Mimal in leh sorkar inah tuichhe paihna tuidawn, ruahtui dawh khâwl emaw, a paihna ṭha taka siam vek tur.
2) Tuihâwk luanna tibuai thei turin kawr leh side drain-ah bawlhhlawh leh leivûng paih loh tur.
3) Thuneitute phalna lo chuan tui luankawr/kawng kamah leivûng paih phal a ni lo.
4) Local/village Disaster Management Committee-te chu an huam chhungah thupek kengkawh tura thuneihna pek an ni.
5) An thuneihna piah lamah chuan DDMA-ah an thlen thei.