KHAWTHLIR

MADC CEM la lut
Mara Autonomous District Council (MADC) chief executive member (CEM) atan Phúrà biala thlan tlin INC MDC H Malvin chu nimin khan Fast Track Court, Siaha district judge Lalngaihmawia Zote-in MADC Environment & Forest conference hall-ah rinawmna thu tiamtirin, CEM atan a la lut.

Thisen pe
KṬP, Rangvamual Branch chuan nimin khan an kohhran hall-ah thisen pek an huaihawt a, Synod Hospital tan thisen unit 15 an pe a, petute mipa 13 leh hmeichhia pahnih an ni.

Khap thu puang
Aizawl bawrhsap Dr Lalhriatzuali Ralte chuan Aizawl district-ah phalna nei loa petrol, diesel leh khawnvartui zawrh khap a nih thu a puang. Petrol, diesel leh khawnvartui phalna nei loa zawrh chu Petroleum Act, 1934, Mizoram Trade Articles (Licensing and Control) Order, 1987 leh Mizoram Motor Spirit and High Speed Diesel (Prevention of Malpractices in Supply and Distribution) Order, 1992-in a khap thu a tarlang a ni.

Inkhawmpui hmang
Human Nutrition & Dietetics Society of Mizoram chuan nimin khan Taxation department auditorium-ah Annual Conference an hmang a, Health minister Dr R Lalthangliana'n a hmanpui. Inkhawmpui hi an president Dr Pachuau Lalmalsawma’n a kaihruai a, kohhran hrang hrang aiawh, tlawmngai pawl leh college aiawhte telin, chawhnuah seminar neih a ni.

Ruahmanna thlirho
Rural Development minister Lalruatkima pisaah nimin khan sorkar hotute'n Khawzawl, Thingsulthliah leh East Lungdar RD block huam chhunga Shyama Prasad Mukherjee Rurban Mission hnuaia hmasawnna hna hrang hrang atana ruahmanna duante an thlirho. Minister chuan, BDO-te chu uluk taka hna thawh a nih theih nan vila enpui ṭhin turin a chah.