Hripui vei leh positivity rate a tlahniam

May 24, Thawhlehni khan Mizoramah Covid-19 vei mi 23 hmuh chhuah a ni, hripui vei zat leh positivity rate a tlahniam leh hret. Nimin khan hripui vei dam tawh mi 27 chhuahtir an ni a; hripui vanga thi an awm lo.

Thawhlehnia hripui vei hmuh tharte chu mipa 12 leh hmeichhia 11 an ni a; RAT hmanga hmuh chhuah vek niin, positivity rate chu 5.68% a ni.

Kumin May thla kal mekah Covid-19 vei thi pahnih chiah an la awm a, May 2 leh May 20 khan mi pakhat ve ve an thi a ni.

IDSP record angin, Mizoramah Covid-19 vei 2,28,205 hmuh chhuah a ni tawh a, mipa 1,06,250 leh hmeichhia 1,21,955 an ni a, mipa aiin hmeichhia 15,705-in an tam zawk. Nimin tlai dar 5 thleng khan mi 2,27,366 (99.63%) chhuahtir an ni tawh a, mi 698 (0.31%) thi tawhin, enkawl mek mi 141 (0.06%) an awm.

Nimin khan Thawhlehni aiin Mizoramah hripui vei enkawl lai an tlahniam hret a, active case tamna ber Lunglei district-ah mi 43 an awm. District pahnih - Siaha leh Lawngtlai district-ah hripui vei an awm rih lo a; Champhai, Hnahthial, Kolasib, Serchhip, Mamit leh Khawzawl district-ah mi 10 aia tlem ṭheuh an awm mek bawk.