PAHOSS dawng tura thlante hnena La pek loh cheng nuai 4,987 a awm ; Sak zawh tawhnaah traffic jam a ziaawm - UDPA

Mizoram sorkar chuan Parking House Support Scheme (PAHOSS) hnuaiah cheng nuai 1,132.30 a pe chhuak tawh a, chutih laiin, dawng tura thlan tawhte hnena la pek loh cheng nuai 4,987 a awm bawk.

RTI Act hmanga zawhna chhannaah PAHOSS nodal department UDPA department chuan, PAHOSS hi traffic jam sutkianna tura siam a nih angin, PAHOSS hnuaia parking house sa zo tawhte awmnaah chuan traffic jam a tiziaawm, tiin an chhang.

PAHOSS dawng turin Executive Committee of PAHOSS chuan kum 2019 aṭangin mi 403 an thlang tawh. PAHOSS hnuaia parking house sak, hman mek 11 awmin pathum chu hman theih tura peih a ni ṭep tawh bawk.

PAHOSS atana budget-a sum dah tawh zat chu cheng nuai 7,002 a ni a, dawng tura thlante hnenah cheng nuai 1,132.30 pek a ni tawh. Beneficiary-te hnena sum pek tur, la pek theih loh táng mek chu cheng nuai 4,987 a ni a, chu'ngte chu K deposit-ah dah a ni. Instalment dawng kim tawh mi 15 awmin, chu'ng mite sum dawn belh khawm chu cheng nuai 154 a ni.

PAHOSS hnuaia ṭanpuina dawng zawng zawngte'n parking house an sak zawh vek chuan LMV 4,211 leh two wheeler 9,017 dah theih a ni dawn.

UDPA department chuan PAHOSS dawng tura thlan zingah inhnûkdâwk an awm thu tarlangin, "An inhnuhdawh chhan chu chhungkaw lam rokhawlhna vang a ni a, inhnûkdawkte'n ṭanpuina sum an dawn zat chu cheng nuai 12 a ni. Ṭanpuina sum an dawnte hi PAHOSS guideline leh deed of agreement-in a phût angin a pungte nen an rawn kîr leh," an ti.

PAHOSS hnuaia parking fee aṭangin sorkarin sum hmuh leh dawn a nei lo tih tarlangin UDPA chuan, "Parking house neitute'n sorkarah chhiah an chawi lo," an ti a, sorkarin hlâwkna a neih chu parking house awmna bulah parking-a harsatna ziaawm deuh chu a nih thu an tarlang.

UDPA department chuan, PAHOSS hnuaiah khawpui laili leh daipáwnna parking house-te thliar hran a nih loh thu tarlangin, "Traffic jam nasatna hmuna parking house sak rawn dilte ngaih pawimawh an ni," an ti.