Silk industry hmasawn nan Mizoram tan cheng nuai 700 chuang ruahman a ni - Union Textiles Minister

Sorkar laipuia Textiles minister of state Darshana Jardosh chuan nimin khan Chawilung khuaa mulberry (thingtheihmu) leh eri chínna hmun a tlawh a; silk industry tihhmasawn nan Ministry of Textiles-in Mizoram sorkar tan cheng nuai 700 chuang a ruahman tih a sawi.

Darshana Jardosh chuan, "India sorkar chuan hmeichhiate dinhmun tihhmasawn nan nasa taka ṭan lâk a tum a, puanthân lama hmasawn nan hmeichhiate'n mawhphurhna pawi­mawh tak kan nei. Hmeichhiate hi chhungkaw enkawltu kan nih theih bakah eizawngtu kan ni thei," a ti.

Chawilung khuaa silk pangang khâwi chu khawvelin a ngaihsan silk a nih thu sawiin Jardosh chuan, "Chawilung khua hian silk hmangin khawvel tukverh in chuang chhuak thei. Silk industry tihhmasawn nan Ministry of Textiles chuan Mizoram sorkar tan cheng nuai 700 chuang a ruahman. Chawilung khua hi sericulture village a nih theih nan Mizoram Sericulture Secretary hriatpuinain hmalak a ni dawn," a ti a; Intodelh India scheme chu Chawilung khuain a chhim phâk dawn thu leh mi tin hamṭhatna thlen chu India sorkar thil tum a nih thu a sawi.

Union Minister hnenah hian Chawilung khua chuan - sericulture link road, solar pump, solar light, health sub-centre, Hmuifang leh Baktawng inkar kawng national highway-a puan leh pawl 10 thleng zirna sikul an neih theih nan hmalakpui turin an lo ngen a ni.

Minister Darshana Jardosh hian mulberry leh eri chíngtute a kawm bakah, an chînna hmun a enpui a ni. Chawilung khuaah hian mulberry leh eri chíngtu chhungkaw 25 an awm a, chhungkaw pakhatin buh ṭín khat hmun vel ṭheuhah chíng ang an ni.