Kohhran Hmeichhe Rorelah Fa nei tam tura inzirtir an rêl

Nimin khan Mission Veng Kohhran biak-inah Mizoram Presbyterian Kohhran Hmeichhe Rorel Inkhawm vawi 11-na neih a ni a, fa nei tam tura inzirtir an rêl. Inkhawmpui thupui chu ‘Sim ula, hawi kîr leh rawh u,’ tih a ni.

Kohhran Hmeichhe Rorel Inkhawm hi chairman Sailuti’n a kaihruai a; ‘Fa nei tam tura inzirtirna neih ni rawh se,’ tih chu pawmin, Central Committee bawhzui turin an dah. Kohhran Hmeichhe committee-a awm turin kum 70 aia tlem lo chin tura rawtna chu a theih chin chinah zawm ṭha an ti a, Synod Executive Committee ngaihtuah zui tura thlen an rêl.

Inkhawmpui hian ‘Tunlai social media hrang hrangte hi a ṭha zawnga hman ṭangkai dan inzirtir ni rawh se, tih chu a pawm a; Synod Hospital leh Lungleia John Williams Hospital tana thawhlawm lâk khawm te, ram pum huapin sual thupha chawina ṭawngṭai rual buatsaihte an rorel zingah a tel bawk.

Rorel inkhawmah hian lawmman chi hnih sem a ni a; Kristian Chhungkaw dinhmun tehnaa pakhatna, ni tin chhung inkhawm neih vekna bial NE Khawdungsei hnenah leh buhfaiṭham tehnaa pakhatna Phainuam bial hnenah hlan a ni.

Report-a a lan danin, pastor bial 215-a tualchhung kohhran 901 leh branch church 73, a vaiin kohhran 974-ah Kohhran Hmeichhia a ding a, chhungkua 1,15,572 an awm. Kohhran hmeichhe member zawng zawng chu 1,88,060 an ni a, kum 2020 aiin 4,138-in an pung.

Ni tin chhung inkhawm nei thei 76,876 awmin, chu chu chhungkua zawng zawng aṭangin 65.65% a ni a; buhfaiṭhàm ṭhâm ziah chhungkua 1,13,644 awmin, chhungkaw awm zat aṭangin 98.33% a ni.