Lawngtlai leh Bungtlang South-ah Picketing chhunzawm zel a ni

Lawngtlai leh Bungtlang South-ah doctor dah belh tur leh doctor sawn chhuahna thupek sût tura Central YLA bultuma sorkar karna kal zelah nimin khan sorkar hnathawk pisa kai turte dan chhunzawm an ni a; picketing hi chhunzawm zel an tum. CYLA hruaitute chuan an lungawina tur sorkar hmalaknaah an la hmu lo tih an sawi.

Tarlan tawh angin, CYLA huaihawtin May 25, Nilaini aṭangin Lawngtlai leh Bungtlang South-ah pisa kai tur leh sikul bakah, bank-a kal turte dan a ni a, nimin khan chhunzawm niin, sorkar pisa leh zirna-in zawng zawng khàr a ni.

CYLA hruaitute chu nimin khan MNF General Headquarters, Aizawla adviser Prof. LH Chhuanawma'n a hmu a; Health Minister-in picketing titawp tura a ngen thu te, Lawngtlai district-in a mamawh anga doctor dah nghal chu tun maiah tihhlawhtlin a harsat thu te, ngaih pawimawh hmasakah sorkarin a neih tur thute Health Minister-in a chah bawk tih a hrilh.

Central YLA hruai­­­­tute chuan, tun din­hmunah mipui tan lungawina leh thlamuanna tur an hmu lo tih sawiin, an thil phûtte tihhlawhtlin a nih hma chuan sorkar an nawrna chu tàwpsan an tum loh thu Prof. LH Chhuanawma chu an lo hrilh lêt a ni.

CYLA hruaitute chuan, Lawngtlai district chu Aizawl district dawta mihring cheng tamna ber a nih thu an sawi rualin, hriselna lama hnufual ber leh infant mortality rate sanna ber a nih thu an sawi a; Lawngtlai District Hospital chu sorkar damdawi-in dangte nena khaikhinin doctor leh nurse indaih lo ber a nih thu an tarlang.

Health department kaihhnawih thila sorkar thil tih reng rengah Lawngtlai district chu a tuartu an nih zel thu sawiin CYLA hruaitute chuan, “Lawngtlai hi min duhsak lo fâl. Kan district-ah Myanmar ráltlân an tam a, hri pawh léng palh thei a ni a, doctor kan mamawhna a sang hle a ni,” an ti.

CYLA hruaitute’n May 25, 2022-a Lawngtlaia thuthar thehdarhtute an kawmnaa an tarlan danin, Mizorama district zingah mihring cheng zat aṭanga chhûtin Lawngtlai district-ah doctor an tlem fál hle a; district dangah chuan doctor pakhatin mi 4,800 - 7,800 inkar enkawl ang an nih laiin, Lawngtlai district-ah chuan doctor pakhatin mi 16,777 enkawl ang a ni thung.