Patea leh Damhauha sûlhnu zirho

Mizo Academy of Letters (MAL) Joint Headquarters, Lunglei chuan nimin khan Lunglei Convention Centre-ah ‘Patea leh Damhauha sûlhnu zirhona’ an buatsaih a, Art & Culture minister R Lalzirliana’n a hmanpui.

Seminar hi MAL Jt Hqrs president C Hrangdula’n a kaihruai a; R Lalzirliana chuan, hnam ropui leh civilization hmasate ropuina leh hmasawnna innghahna chu an culture leh history zîktluak taka en lêt tur an neih vang a nih thu a sawi.

Art & Culture Minister chuan, “Keini pawhin kan history leh culture kan hriat chian a, kan hlut a ṭul tak zet. Mizo nun ze mawi kan chawi nun zel theih nan a pawimawh a, kan hranghlui ziak mite leh hla phuah thiamte lakah bat tam tak kan nei a ni,” a ti.

Zirhonaah hian BH Khuma’n ‘Damhauha leh khawltang lunglen’ tih a sawi a, Lalduhawma Chhakchhuakin ‘Patea vanram thlir dan’, Rohmingthanga Ralte-in ‘Damhauha leh khuarel’ leh TC Jonunsanga’n ‘Patea hlain Zo fate thu leh hla a tihhausak dan,’ tihte an sawi bawk.