Champhai chhehvela quarry endik

Champhaia Joint Inspection Team chuan SDC Esther Leihang hoin nimin khan Champhai chhehvela lung lakna (quarry)-te hrilh lâwk loin an endik.

Ministry of Home Affairs (MHA) leh Mizorama Home department thurâwn bawhzuiin Champhai DC chuan puak thei thil hmangtu leh zuartu, explosive license holder leh no objection certificate neite’n dan ang taka thil an tih leh tih loh endik turin Joint Inspection Team a din a ni. Team-ah hian team leader Esther Leihang bakah, police aiawh, IPRO leh Geology & Mining department area supervisor-te an tel.

Joint Inspection Team hian nimin khan explosive license nei quarry pahnih leh NOC pek Petroleum & Explosive Safety Organization (PESO) license nei pakhat tlawhin, mihring tana hlauhawm thlen thei lo tura khuahkhirh a nih leh nih loh an enfiah a ni.

Team hotute chuan, puak thei thilte chu fimkhur taka vil leh enkawl ngai a nih thu te, a nihna tur ni loa hman a rem loh thu leh dan loa thil ti an awm chuan hrem theih an nih thute an hrilh a; phalna an dil chhan leh an hmuh chhan ang taka puak thei an kawlte hmang tur leh dan loa thil tihnaa hman a nih loh nan fimkhur turin an chah bawk.