Doctor 51 indaih lohna a awm - Health Minister

Health minister Dr R Lalthangliana chuan nimin khan Mizorama doctor indaih lohna chungchangah thuchah a tichhuak a; tun dinhmunah doctor 51 indaih lohna a awm thu leh doctor awm lohna primary health centre (PHC) pakua a awm mek thu a tarlang.

Dr R Lalthangliana chuan, Health department-in MPSC kaltlanga doctor lak thar tur 16 a neih mek thu sawiin, “Court case avangin doctor la thei loin hun rei tak tunah hian a inchiah mek a, a pawi khawp mai. Anni bakah hian tun hnai maiah zirna sang zawk specialist (post graduate) zir tura kal thar 14 leh pension-a chhuak 12 kan nei a, tun hnaiah doctor pali an thih bakah, ZMC-ah doctor panga awm nghet kan neih belh ta bawk,” a ti.

Doctor awm lohna PHC pakua a awm thu sawiin HFW Minister chuan, “Chu’ngah chuan kan dah a ngai ta a, chuvang chuan, kan senior doctor-te pawh hla deuh hleka han dah ngai khawpin dinhmun buaithlak deuhah kan ding a, Zoram mipuite’n kan hriat ka duh khawp mai,” a ti a; harsatna sukiang turin theihtawp an chhuah thu leh mipui leh NGO-te pawh harsatna hriatthiampuia innawr buai lutuk lo turin a ngen a ni.

Health Minister chuan, India ram puma infant mortality rate (IMR)-ah Mizoram dinhmun a ṭhat ber (a hniam ber) thu a sawi a, “Mizoram hi India rama IMR hniam ber kan ni tih min rawn puan chhuahsak a. Chu chu sample registration system an ti mai a, a buatsaihtute hi Office of the Registrar General of India te an ni. India ramah nausen thi tlem ber kan ni ta,” a ti.

HFW Minister tarlan danin, Mizoram IMR chu pathum (nau piang 1,000 zelah pathum an thi) a ni a, pahnihna chu Nagaland niin, pathumna chu Sikkim leh Goa an ni.