Serchhipa doctor-te thlaktu awm loa sawn chhuah remti lo

Serchhip NGO Coordination Commit­tee hruaitute May 25, Nilainia ṭhukhawm chuan tun hnaia Serchhip District Hospital aṭanga sawn chhuah Dr K Vanlalhriati chu amah thlâktu tur dah loa sawn a nih avangin a chhuah an remtih loh thu an tarlang. NGO thuchhuak hi Serchhip Ṭhalai Pawl (SṬP) chuan an thlàwp thu an puang.

Serchhip Joint NGO-te chuan, Dr K Vanlalhriati chu amah thlaktu tur sorkarin a dah hma chuan sawn chhuah an remtih loh thu an sawi a; Serchhipa thawk lai Dr C Lalrinzama, thu leh awm hma Serchhipa awm zui rih tura tih pawh an ngaih a ngam lo tih sawiin, Serchhipa awm nghet tura order tichhuak turin sorkar an ngen a ni.

SṬP chuan thu­chhuah siamin, Mizorama district hospital hrang hrangah rualkhai zawka doctor sem zâi ṭul an tih thu an tarlang a, “Doctor transfer & posting order tihchhuah apianga lungawi lohna thâwm hriat tur awm ṭhin hi transfer & posting kalphung mumal awm loh vangah kan ngai,” an ti.

SṬP chuan, district hospital tinah specialist doctor post nghet siam a ṭul hmasaa an ngaih thu sawiin, “Department danga officer-te’n transfer & posting kalphung mumal tak an nei ang hian doctor transfer & posting chungchangah pawh kalphung mumal tak neih hi thingtlang mipui leh doctor tam tak harsatna sutkianna tur niin a lang,” an ti a, doctor transfer & posting mumal a awm theih nan sorkarin hma la se an duh thu an sawi.

Sorkar hnathawkte chu transfer theih an ni tih sawiin SṬP chuan, “Sorkarin an dahna hmun apianga awm tur an nih laiin, an aiawh dah loa transfer an ni ṭhin hian mipui harsatna nasa tak a siam ṭhin. Doctor transfer bikah phei chuan hetiang hi thleng tawh lo se kan duh,” an ti.

SṬP tarlan danin, May 23, 2022 khan Serchhip District Hospital-a thawk lai Dr Laltharzeli Fanai, gynecologist leh Dr K Vanlalhriati, padaetrician-te sawn chhuah an ni a; Dr C Lalrinzama, gynecologist pawh Serchhipah dah ngheh ni se an duh bawk a ni.