Sorkar sum harsatna avangin sikulte sorkarin a la thei rih lo

Mizoram Govt. Adhoc Aided High school Teachers’ Association (MIGAHTA) chuan nimin khan Chanmari YMA Hall-ah General Conference an hmang a, School Education minister Lalchhandama Ralte-in a hmanpui. Minister chuan, MIGAHTA-in sorkara lak luh an phût chu sorkar sum harsatna avangin tih mai theih a nih loh thu a sawi.

Lalchhandama Ralte chuan, Mizoram sorkarin sum harsatna a tawh thu sawiin, “School Education-ah ringawt hian adhoc aided high school 129, middle school 67 leh higher secondary school 10 vel an awm. Lumpsum school 100 chuang adhoc aided-a hlàn kai beisei te, private school aṭanga lumpsum-a hlàn kai beisei sikul 100 chuang leh Samagra Shiksha hnuaiah kum tam tak hlawh ngaia ṭhu, hlawh tihsan beisei thawktu 5,000 vel an awm,” a ti.

Education Minister chuan, khawvel hmasawn zel karah naupangte hmakhua thlir turin zirtirtute a sáwm a, khawi hmunah pawh Mizo zirlaite chu thawn chhuah tlaka chher leh mahni hnaa inpe thar leh zual turin a chah bawk.

MIGAHTA-ah hian high school 129 awmin, member 900 vel an awm a; General Conference-ah hian ‘Sorkarin adhoc aided high school-te provincialise-ah min hlangkai rawh se’ tih resolution an pass a, chawhnuah an pawl hruaitu thar tur an thlang a ni.