Fûrah current kan nei mumal ngai lo - Lungrang South VC

Lungrang South Village Council chuan thuchhuah siamin, fûr laiin an khua leh a chhehvel khaw pakuate'n kawlphetha an neih mumal ngai loh thu an tarlang a, "Tunah pawh chawlhkar khat dáwn kan thim leh tawh," an ti.

Kum tam tak chhung fûr laiin power supply an neih mumal ngai tawh loh thu tarlangin Lungrang South VC chuan, "Kuminah pawh fûr ruahtui a tlak avangin current kan nei mumal leh thei tawh lo. Current chhiat chhan ber hi a line clear ṭhat loh vanga thleng a ni. Department-a thawktu indaih loh vang leh a thawktu awm chhunte inthlahdah vang a ni," an ti a, ruahsur leh thli thaw hlekah kawlphetha an neih loh zel thu an tarlang.

Lungrang South VC chuan, an khaw chhehvelte nen ṭum tam tak kawlphetha an neih ṭhat theih nan line an singsak ṭhin thu tarlangin, "Chuti chung pawhin Mizorama current nei ṭha lo ber khua kan ni reng a, sorkar department inthlahdah vangah kan ngai. Fûr ruahtui tlak tam hma ngeia current line-te min siamṭhatsak tur leh thawktu dah belh turin sorkar leh department kan ngen a ni," an ti.