HIV/AIDS do chungchang sawiho

Nimin khan Secretariat Conference Hall-ah UNAIDS leh Centre for Diseases Control and Prevention (CDC), USA hotu Mizorama lo kalte pualin HIV/AIDS chungchangah inràwnkhawmna hun hman a ni.

Inrawnkhawmna hi Health minister Dr R Lalthangliana’n a kaihruai a, sorkar department hrang hranga HIV donaa thawk te, kohhran leh Central YMA hruaitu te, vantlang aiawhte an tel.

Health Minister chuan, Mizorama HIV/AIDS pung zel chu department pakhat chauh emaw, páwl pakhat chauh emaw do hneh chi a ni lo tih a sawi a, "Kan zavaia ṭangruala do tlân a ṭul tawh a, chumi ti thei tur chuan inràwnkhawmna hi a bul ṭanna atana buatsaih a ni," a ti.

Inràwnkhawmnaah hian Mizoram State AIDS Control Society project director Dr Lalthlengliani'n HIV/AIDS-a Mizoram dinhmun, hmalaknate leh hmachhawpte a sawi a; pawl aiawhte'n thu an sawi bakah, sorkar department aiawh telte'n HIV/AIDS donaa hma an lâk dante an sawi bawk.

Health secretary R Lalramnghaka kaihhruaiin sawihona hun hman a ni a; HIV/AIDS do chungchang pawl 9 leh pawl 10 zirlaiah telh rawtna thlen leh naupang sunday school zirlaiah damdawi hman sual leh HIV laka invênna chungchang telh tura rawtna thlen an rêl a ni.

Inrawnkhawmnaa tel tur hian UNAIDS, India office aṭangin country director Dr David Bridger leh programme advisor Dr Nandini Kapoor te an tel a; CDC aṭangin programme director Dr Melissa Nyendak, public health specialist Dr Sudhir Chawla leh Ramesh Allam telin, UW-ITECH aṭangin technical specialist Abhina Aher te an tel.