KHAWTHLIR

Thisen pe
Sihphir Higher Secondary School NSS chuan nimin khan thisen pek an huaihawt a, Synod Hospital-ah kalin thisen unit 13 an pe a, petute hi mipa 10 leh hmeichhia pathum an ni.

Nungcha humhalh
Lunglei District Wildlife Crime Control Sub-Unit chu an chairman Rex Zarzoliana, Lunglei SP hoin a pisaah an ṭhukhawm a, ramsa leh a kaihhnawih thila dan bawhchhiatna awm theite ven dan tur leh dan bawhchhiatna a thlena bawhzui dan turte an sawiho. Lunglei chhehvel remchang laiah mipui zirtirna lam hawi signboard târ an rél a ni.

MZU-ah seminar
Mizoram University-a Department of Management chuan nimin khan 'Local Government & Management in North-East India' tih thupui hmangin seminar an buatsaih a, Rural Development minister Lalruatkima'n a hawng. Seminar-ah hian India hmarchhak state hrang hrang bakah Delhi leh Kolkata aṭangin zirlai an tel a, vawiinah chhunzawma zawh a ni ang.

MASSA inkhawmpui
Mizoram Agriculture Subordinate Service Association (MASSA) chuan nimin khan Agriculture conference hall-ah General Conference vawi 38-na an hmang a, ‘Oil Palm Production Technology’ leh ‘Management of Fall Army Worm’ chungchang inzirtirna hun an hmang nghal. Agriculture director James Lalsiamliana chuan, SEDP hnuaia fú leh vaimima hmalak mekah ṭanpuina dawngtu mi 14,000-te an hlawhtlinna turin theihtawpa puih an ngaih thu a sawi.

Chawimawina hlan
Governor Dr Hari Babu Kambhampati chuan nimin khan Raj Bhavan-ah ramri hrûla Project Pushpak-in kawng siam hna a thawh meka enkawltu Border Roads Organisation (BRO)-a hna thawk ṭha mi pali hnenah chawimawina a hlân.