Hripui vei enkawl mek mi 135 an awm

May 25, Nilaini khan Mizoramah Covid-19 vei mi 21 hmuh chhuah a ni. Nimin khan hripui vei dam tawh mi 27 chhuahtir an ni a, hripui vanga thi an awm lo. Hripui vei enkawl mek mi 135 (0.05%) chiah an awm mek.

Nilainia hripui vei hmuh tharte chu mipa 10 leh hmeichhia 11 an ni a; RAT hmanga hmuh chhuah vek niin, positivity rate chu 9.59% a ni.

Kumin May thla kal mekah Covid-19 vei thi pahnih chiah an la awm a, May 2 leh May 20 khan mi pakhat ve ve an thi a ni.

IDSP record angin, Mizoramah Covid-19 vei 2,28,226 hmuh chhuah a ni tawh a, mipa 1,06,260 leh hmeichhia 1,21,966 an ni a, mipa aiin hmeichhia 15,706-in an tam zawk. Nimin tlai dar 5 thleng khan mi 2,27,393 (99.64%) chhuahtir an ni tawh a, mi 698 (0.31%) thi tawhin, enkawl mek mi 135 (0.05%) an awm.

Nimin tlai dinhmun angin, Mizoramah hripui vei enkawl lai tamna ber Lunglei district-ah mi 44 an awm a, district pahnih - Siaha leh Lawngtlai district-ah hripui vei an awm rih lo. Champhai, Hnahthial, Khawzawl, Kolasib, Serchhip leh Mamit district-ahte mi 10 aia tlem ṭheuh an awm mek bawk.