Hindi zirtirtute leh sorkar an inrem MCHTA-in chaw nghei an titawp nghal
Mizoram CSS Hindi Teachers Association (MCHTA)-in sorkara thil phût an neih chungchangah nimin khan Mizoram sorkar leh MCHTA-te'n inremna an siam a; inremna an siam hnuah MCHTA-te'n sorkar kar nana February 27 tlai aṭanga chaw an nghei chu an titawp nghal.
CSS hnuaia Hindi zirtirtute harsatna chungchangah hian Central YMA hruaitute chuan Thawhṭanni zan khan chief minister Lal Thanhawla a chenna bangla-ah an hmu a, MCHTA hruaitute nena an inbiak theih dan an sawipui.
CYMA hmalak kal zelah nimin chawhma khan Chief Minister, School Education Minister, Parliamentary Secretary (School Education) leh MCHTA hruaitute chu an inbia a, CYMA hruaitute pawh an tel.
Inbiaknaa an thusawi hrang hrangte chu MCHTA hruaitute chuan CM bangla thlanga chaw an nghei mekna hmunah member-te hnenah an puang a; ngaihdan inang lo deuh awm mah se, ruahmanna an siamte sorkarin a pawm theih leh theih loh an ngaichâng a ni.
Chumi hnuah MCHTA hruaitute thil phût keng chungin CYMA hruaitute chuan Chief Minister an hmu leh a, chuta inremna an siamte chu MCHTA hruaitute hnenah CYMA hruaitute'n an pe chhawng leh a. Inremna hi MCHTA hruaitute'n an member-te hnena an chhiar chhuah hnuah nimin tlai dar 4 vel khan chaw nghei titawpin an ṭin darh a ni.
CYMA president Lalbiakzuala chuan, MCHTA-te'n an thil phût nawrna atana chaw an nghei chungchanga an inrawlh chu YMA tih tur a ni nge, tih loh tur a ni tih a hriatthiam loh thu a sawi a, "Kan member tam tak rilṭám leh mangang taka an awm avangin, inremna a awm theihna atan kan pên chhuak ve tawp mai a ni," a ti.
MCHTA hruaitute chuan, sorkar nena an inremna a hlawhtlin ngei theihna atan theihtawp an chhuah zui zel dawn tih sawiin, "Sorkar laipuiin kan extension a tihhlawhtlin loh chuan kan inremn hi nawrna atan kan hmang ve tawh dawn a ni," a ti bawk.
Sorkarin a duhsakna hriatthiam ve a ngaih thu sawiin MCHTA hruaitute chuan, "Sum harsatna vangin extension chhungin sorkar a inbuatsaih ve ang a, tun dinhmun aia ṭhaah min dah ve ngei kan ring," an ti a; an thawh hun pawhsei a nih loh pawhin, an himdamna tur an ngaihtuah dawn tho thu an sawi.
Inremna an siam zinga pakhat, state sorkarin zirtirtute thla li hlawh leh April 2016 hlawh an lâk bâng Rs. 10,000 advance-a a pek tur chungchangah CYMA hruaitute leh Chief Minister-te an inbiak laiin, School Education Secretary telephone hmanga biak a ni a; a rang thei ang bera Finance department-a kaltir tura tih a ni.
CSS Hindi teacher-te hian dah ngheh leh thla 10 hlawh an lak loh pek phûtin pen down strike, mass casual leave leh kawngzawhte an huaihawt tawh a; chumi hnuah an thil phût a la hlawhtlin loh avangin CM bangla bula sit-in demonstration an nei leh a, February 27 tlai aṭang khan chaw an nghei ṭan a ni.
CSS Hindi teacher-te thawh hun (contract) hi nimin khan a tawp a, thu leh a awm hma chuan an hna an chawlhsan hrih dawn a ni.
MCHTA leh sorkar inremna
1) Sorkar laipuiin zirtirtute hlawh la pe lo mah se, state sorkarin zirtirtute thla li hlawh leh April 2016 hlawh an lak bâng Rs. 10,000 advance-in a pe ang.
2) Extension beisei mek hi a hlawhtling a nih chuan tuna thawk mekte thawh chhunzawm theih nan sorkarin hma la ang.
3) Zirtirtute hi an thawk chhunzawm a nih chuan an training ve theih nan sorkarin hma a lakpui ang.
4) Extension hi a hlawhtling lo a nih chuan state sorkarin a theih angin hma a la ang.
5) Sorkar laipui hmalak dan enfiaha bawhzui turin sorkar hotute kaihhruaiin CYMA, MZP, MSU leh CSS Hindi zirtirtute aiawh mi pathum a hma thei ang berin Delhi-ah an kal ang.