Center of Excellence hostel atan MoU ziak

Police department leh Mizoram Football Association (MFA) chuan Aizawla football zirna, Center of Excellence (CoE) atana hostel hman hawh turah nimin khan inrem­na, Memorundum of Under­standing (MoU) an ziak.

MoU-ah hian Police department aiawhin DGP Thianghlima Pachuau leh MFA aiawhin honorary secretary Lalnghinglova Hmar ten hming an ziak.

Tata Trusts, U-Dream, Mizoram sorkar leh MFA-te chuan Rajiv Gandhi Stadium behchhanin football zirna changtluang tak Centre of Excellence an kalpui dawn a; MoU an ziah ang chuan, 3rd. Battalion MAP hmuna Police Center sak mek chu luah theih a nih hunah Center of Excellence hostel atan hun eng emaw chen hman a ni ang.

Center of Excellence atan hian Tata Trusts-in sum leh pai an tum dawn a, U-Dream lamin technical lam khawihin foreign coach leh coach ṭha dangte an chah lut dawn a, Mizo naupangte'n changtlung taka football an zir theih dan tur an buaipui dawn a ni.

CoE hi Tata Trusts leh U-Dream thawh dunnaa India rama a hmasa ber tur a ni a, hemi kalpuina tur hian Mizoram sorkara Sports and Youth Services Department leh MFA nen pawh thawhhona an lo ziak tawh.

Tata Trusts leh U-Dream ṭang kawp hian Mizo naupang 17 leh coach pakhat chu Germa­ny-ah foot­ball an zirtir mek a ni.