National Science Day hman a ni

Nimin February 28 kha National Science Day a ni a, Mizoram hmun hrang hrangah hman niin, thupui chu 'Science and Technology for Specially Abled Persons' tih a ni.

Mizoram Science, Technology & Innova­tion Council (MISTIC) chuan IPR directorate auditorium-ah an hmang a, Planning Board vice chairman H Liansai­lova khuallian a ni. Lian­sailova chuan, science leh technology lama thiam­nate chu Mizo­ram ei leh bar tihhmasawnna atan hman a ṭul thu a sawi.

H Liansailova chuan, tunlai hmasawnnaah science leh technology tel lo chuan hmasawnna a awm thei lo tluk a nih thu a sawi a, "Science & technology hian hriselna, ram venhimna, zirna, eizawnna leh thil chi hrang hrangah hmun pawimawh ber a luah zel tawh a, Mizoramah ni tin nun khawsakna tinrengah kan ṭangkaipui hle a, hmasawn zel turin kan inbuatsaih zel a ngai," a ti.

Mizoram chu state dangte aiin science leh technology lamah a hniam bik loh thu sawiin, "Mizoram mipui tam berte eizawnna lo neih leh ran vulh lamah tunlai thiamna ṭangkai zawka hman dan kan hmuhchhuah a pawimawh hle. Kan ram hausakna Pathianin a dah hâi chhuak turin hman ṭangkai tum ila, kan ram economy siamṭhat nan hmang thei ila, tih dan phung pangngai thlakna tur, awlsam leh hlâwk zawka kan thar chhuah theihna tur siam chhuahte tum ila a ṭha hle ang," a ti a; zirna, thiamna leh finnate chu thil thar hmuhchhuah nan hman tum turin mithiamte a chah.

Inkhawmah hian Planning secretary (Science & Technology) Dr C Vanlalramsanga pawhin thu a sawi.

Chief scientific officer Dr RK Lallianthanga'n National Science Day a sawifiah a; India scientist ropui Dr CV Raman-a’n February 28, 1928-a ‘Raman Effect’ a hmuh chhuah hriat reng nan kum 1987 aṭangin February 28 chu National Science Day-ah hman ṭhin a nih thu a sawi.

National Science Day hmannaah hian National Institute for the Locomotor Disabilities (RC-NILD)-te'n exhi­bition an buatsaih a, pian­phunga rualbanlote tana siam khawl leh hmanraw chi hrang hrang an pho chhuak a ni.

MISTIC leh Pa­chhunga University College (PUC) pawhin National Science Day hi PUC-ah an hmang bawk a, rualbanlote'n PUC zirlaite hmaah thu an sawi.

National Science Day hi Serchhip College-ah pawh hman a ni Serchhip College principal Lal­hmangaiha Sailo-in a hman­pui. Serchhip College zirlaite bakah, Chhiah­tlang High School, Serchhip High School leh PCR High School zirlaite an tel a ni.