Central YLA hruaitute'n enfiah

Central Young Lai Association (CYLA) hruaitute chuan, February 27, 2017 khan cheng vbc. 25.64 senna tur, Greater Lawngtlai Water Supply Scheme an tlawh a, a dinhmun an enfiah.

CYLA hruaitute hi PHE department hotute'n hna thawh zawh a nih tawh thu an lo hrilh a, "Tun dinhmunah hna hi thawh zawh ni tawh mah se, tui lakna tur ber Chhimtuipui lui tui pump chhuah a la ni lo. Tui pump-na tui chunga láng thei submersible pump chu tui lianin a la a, hei hi siamṭha leh turin hmalak mek a ni," an ti.

PHE department hotu­te sawi danin, Chhim­tuipui lui hi pump theih la ni lo mah se, Chengkawl lui aṭanga tui lak a ni a, mipui hnenah sem chhuah a ni.

Greater Lawngtlai Water Supply Scheme siam hna hi April 30, 2012-ah thawh ṭan a ni a, Excel­sior Merchant Pvt.Ltd., Kolkata-in thawkin, a senso chu Ministry of DoNER aṭanga hmuh a ni.