Natna benvawn tuar tana programme NPPC zirho

Nimin khan Aizawl Civil Hospital conference hall-ah natna benvawn vanga damlo na zual, khumbeta damlote tan bika duan National Programme for Palliative Care (NPPC) zir chianna hun buatsaih a ni a, medical officer-te leh nurse-te an tel.

NPPC zir chianna hun hi Hospital & medical Education (HME) hoint director Dr KK Chhetri-a'n a kaihruai a, HME director Dr K Lalbiak­zuala khuallian niin, Aizawl East CMO Dr Lalze­puii khualzahawm a ni.

Dr K Lalbiakzuala chuan, NPPC hnuaia damlo enkawltute'n ṭhahnem­ngai taka damlo an enkawl a ngaih dawn thu a sawi a; record felfai taka vawn a nih theih nan leh hnathawh rah lang ngei tura theihtawp chhuah turin doctor leh nurse-te a chah.

NPPC state nodal officer Dr Eric Zomawia'n NPPC awmzia a sawifiah a; Mizoram State Cancer Institute-a oncologist Dr Jeremy L Pautu-in NPPC kalpui dan tur a sawifiah thung.

NPPC hi India ram state dangah chuan chang­tlung taka kalpui a ni tawh a, Mizoramah erawh chuan December 2016 aṭangin kalpui ṭan a ni. He programme hnuai­ah hian cancer, HIV/AIDS, stroke leh natna khirhte vanga khumbeta damlote a bika enkawl an ni ang.

NPPC hnuaiah hian damlo, mahni in lama in enkawlte pawh tlawh chhuah a, a ṭul anga enkawl an nih theih nan leh chhawmdawl an nih theih nan hmalak a ni dawn a; damlo na zualte thlamuan tur te, tihdam harsa leh beisei bo tawhte pawh an natna chhâwk theitu tur damdawi a thlawna pek tura ruahman a nih bakah, damlo chhungte thlenga puih dan tur a awm a ni.