KHAWTHLIR

Hun pawtsei
DPAR chuan tun hnai khan notification a tichhuak a; Health department-a principal secretary Dr K Ropari leh Hospital & Medical Education director Dr K Lalbiakzuala te chu thla khat atan sorkar hna an thawh hun pawhseisak a nih thu a tarlang. Dr K Ropari leh Dr K Lalbiakzuala te hi an kum pangngaiah chuan nimin khan superanuation pension-a an chhuah hun a ni a, March 31, 2017 thleng an thawh hun pawhsei a ni.

Veng fai
North Eastern Development Finance Corporation Ltd. (NEDFi) chuan February 16-28, 2017 chhunga ‘Swachhata Pakhwada’ an hman pualin veng chhung faina kawnga intihsiakna an buatsaih. Intihsiakna hi category pahnihah ṭhenin, commercial area leh residential area-ah an ṭhen a; commercial area-ah Dawrpui Veng pakhatna an ni a, residential area-ah Laipuitlang pakhatna an ni. Pakhatnate hnenah hian lawmman atan Rs. 50,000 ve ve an hlan a ni.

Phalna lâk ngai
Serchhip DC chuan thupek chhuahin, ram chhung venhimna atan leh boruak chhiatna pumpelhna atan, an district chhunga sky diving, para sailing, hot air ballon flying, etc., mimal emaw pawl emawa ti tur leh huaihawt turte chuan DC emaw Indian Air Force emaw aṭangin phalna an la hmasa ngei tur a nih thu a tarlang.

Khawl hawng
Tisopi khua, Siaha district-a Self Help Group-te hman tur, aieng herna leh a funna khawl chu Thawhṭanni khan DRDA project director VL Hruaizela Khiangte-in a hawng.