'Traffic Jam Free Aizawl' hun hmang

Nimin khan Vanapa Hall-ah 'Traffic Jam Free Aizawl' tih hun hman a ni a, Coordination Committee on Traffic Management (CCTM) chairman leh Home minister R Lalzirliana, Finance minister Lalsawta, Transport minister John Rotluangliana leh parliamentary secretary (Home) Lt.Col. ZS Zuala ten an hmanpui.

CCTM chairman R Lalzirliana chuan, Aizawl khawpui kawngpui chu a zím lutuk tawh lo nia sawiin, kawngpui dunga lirthei dah ṭhin chu traffic ti jam nasatu a nih thu a sawi a; Aizawlah traffic jam a ziaawm theih nan mipui an ṭan rual a pawimawh thu sawiin, local council-te'n an veng ṭheuhah mawhphurhna sang tak an nei a, sorkar hmalaknate ṭhahnemngai taka ṭawiawm turin a sáwm.

R Lalzirliana chuan, in sa tharte'n lirthei dahna tur an siam ṭhin chu lawmawm a tih thu sawiin, "Khawpui lailia in hmun nei lo, mi harsa zawkte tan pawh an ram neihna hmunahte mi dangte hman hawh tur garage an siam hi eizawnna a tling a ni," a ti a; kea kalte chu kalna tur bika siam (foothpath) hmang uar turin a chah.

Finance minister Lalsawta chuan Aizawl khawpuiah traffic jam a ziaawm theihna tura sorkar hmalaknate a tarlang a; Aizawl chu zone hrang hranga ṭhen turin buatsaih mek a nih thu leh Uber leh Ola (taxi service)-te remruatna ang hmanga awlsam, tláwm leh rang taka taxi service kalpui dan ngaihtuah mek a nih thu sawiin, "Heng ruahmannate hi kalpui a nih hunah chuan kawngpui a lo thâwl zawk tawh dawn a ni," a ti.

Lalsawta chuan, December 1, 2017-ah chuan Aizawla lirthei eng chi pawh, a neitu zawng zawngin lirthei dahna neih vek tawh tur a nih thu a sawi a; lirthei neitute chu December 1 hma ngeia an lirthei dahna siam turin a chah.

Transport minister John Rotluangliana pawhin thu sawiin, Aizawl chu Traffic Jam Free a nih theih nan sorkar hmalakna bakah, kawngpui hmangtu mipui leh lirthei khalhtute an pawimawh thu a sawi a; lirthei khalhtute chu hawihhâwm tak leh mi dang tana harsatna siam lo thei ang bera khalh tura chahin, "Kan thil tumte a hlawhtlin theih nan kan ṭan rual a ngai a ni," a ti.

Traffic Jam Free Aizawl programme hi Home department additional secretary Lalbiakzama'n a kaihruai a; zawhna leh chhanna hun hman a ni.