Zeng hri danna naupang 10,682 pe

Mamit District Task Force on Immunization chu nimin khan an chairman Lalbiaksangi, Mamit DC hoin DC Conference Hall-ah an ṭhu a; February thlaa Intensified Pulse Polio Immunization (IPPI) first round kalpuiah Mamit district-ah naupang kum 5 hnuai lam 10,682 hnenah zeng hri danna pek a nih thu tarlan a ni.

Meeting-ah hian kum­in February thlaa IPPI first round kalpui dan thlir let a ni a; Mamit district-a naupang kum 5 leh a hnuai lam 10,948-te zeng hri danna pek tumah naupang 10,682 pek a ni a, hri danna pek zat hi 97.5% a nih thu an tarlang.

Mission Indradanush (MI) fourth phase first round micro plan thlir lêt nghal a ni a; naupang kum hnih hnuai lam 139 pek tumah naupang 91 (65%) hnenah hri danna pek niin, nu naupai 43 aṭang­in 36 (83%) hnenah hri danna pek a ni. MI fourth phase second round thlir lâwkna a ni a, naupang 86 leh nu naupai 28 tuam tum a ni.

Meeting-ah hian Mamit District Hospital-in Quality Assurance Certificate a hmuh theih nana hmalak dan tur sawiho a ni a; tunah hian khum 30 awmin, doctor paliin an ṭhutchilh mek thu leh Quality Assurance hmuhna tura tehna 70% chu tun dinhmunah tlin a la harsat an sawi a; tunah 58% a hmuh mek thu an sawi bawk.

Meeting chuan, nu insiam tawh, naupai leh site tana hamṭhatna dawn tur ang chi an dawn theih nan recommendation sorkar­ah thehluh ni se, an ti. He hamṭhatna hi nau pai thei lo tura insiam tawh, naupai lehte'n nau an pai aṭanga ni 30 chhungin an dil thei a ni.

Nausen thi zat tehna, Infant Mortality Rate (IMR) leh raicheha thi zat tehna, Maternal Mortality Rate (MMR) pawh thlirho a ni a; kum 2016 chhung khan Mamit district-ah nu, nau chunga thi pahnih leh nausen kum khat hnuai lam thi 17 an awm thu an sawi lang.

Meeting-ah hian Mamit district CMO, SMO, DMS, DEO, Additional SP, medical officer-te leh tlawmngai pawl hruaitute an tel a ni.