Covid-19 avanga inkharkhipin Kohhran thawhlawm a nghawng dan

Covid-19 hripui léng vanga Mizoramah March 23, 2020 aṭanga inkhàrkhip hnua mi tam takin hna an thawh theih loh laiin, Mizorama kohhran lian ṭhenkhat chuan Pathian ram thilpek a tlâkhniam phah loin an hria a; kohhran ṭhenkhat chuan a tlakhniam phahin an hre thung.

Mizoram Synod

Vanglaini palaiin a kawmnaah Mizoram Synod-a finance manager Upa Lalsawmliana chuan, inkhàrkhip chhungin Aizawl khawpui chhunga pastor bial 45-ah Pathian ram thilpekin nghawng a nei lo tih a sawi a, "A hmaa an thawh zat thawh pha lo bial an awm lo a, bial tam takah thawhlawm a pung zawk," a ti. Upa Lalsawmliana chuan, inkharkhip vanga mipui chêt chhuah a harsat avangin thingtlang lam bial eng emaw zat aṭanga pawisa lut tur chiang sa an dawn theih rih loh thu sawiin, "Nikum April, May leh June thlate leh kumina lockdown thla thum khaikhin chuan, cheng nuai 400 velin kan la pha lo. Hei hi bial treasurer-te an zin chhuah theih loh vang te, an khaw hnaiah bank a awm remchan loh vangtea kan dawn theih loh a awm nual vang a ni," a ti a; Synod-a la thehlut lo tam tak an awma an ngaih avangin thilpekah hma an sâwn nge, an tlahniam tih chiang taka sawi a harsat rih thu a sawi.

Synod Finance Manager chuan, Covid-19 vanga harsatna a awm hma chuan thla khatah Pathian ram thilpek cheng nuai 2100 vel an dawng ṭhin tih a sawi. Bialte'n sum an pek dan sawiin, "Bialin bank-a an account-a an dah hnuah Synod account-ah an transfer a, chumi hnuah bial treasurer-te'n thawhlawm an thawh dan head hrang hrangte chu Synod-ah an report leh a, Whatsapp kaltlangtea report pawh a ni ṭhin," a ti.

Baptist Church of Mizoram (BCM)-a finance director Rev. Ramngheta chuan, a tlangpuiin inkhàrkhipin Pathian ram thilpek a nghawng rih loa an ngaih thu a sawi. Rev. Ramngheta chuan, Pathian ram thilpek chu sorkar hnathawk hlawh batsak a nih hunah a tlem phah mai theia an ngaih thu leh beisei a phâk loh hun a awm an rin thu a sawi a, "April thlaah kan tlahniam hret a, June 30-ah account kan khâr tawh a, June thla thawhlawm la lut hman lote chu July thlaah kan chhiar tel ang," a ti. Khawpui chhunga pastor bialte'n Pathian ram thilpek chu thla bîa an tihfel mai theih laiin, thingtlang lamah chuan thla hnih/thumte a hlâwma an dawn thu sawiin, "June thla bika kan dawn chu hniam lutuk lo mah se, nikum June thla chu kan phâk lo deuh," a ti a; bial kilkhâwr deuh, bank kal remchang thei lote'n an thawn theih loh hlawm thu a sawi.

BCM Finance Director sawi danin, BCM-ah hian pastor bial 88 a awm a, Pathian ram thilpek chu thla khatah cheng nuai 520-530 inkar vel an dawng ṭhin a ni.

Salvation Army (India Eastern territory) finance secretary Maj. KVL Sawmthanga chuan, inkharkhipin an kohhranah Pathian ram thawhlawm lut a nghawng tih a sawi a, chutih rualin, an rin aia a nghawng nasat loh thu a sawi.

Vanglaini palai zawhna chhangin Maj. KVL Sawmthanga chuan, lockdown chhung - April, May leh June thlaa thawhlawm chu chawhrual­in thla khatah cheng nuai 38 vela a tlakhniam thu a sawi a, "April thlaah khan a tlahniam zual deuh a, May leh June-ah erawh chuan a tlahniam tam lo. Lockdown lai hian thawhlawm hi a tlahniam viau turah kan ngai a, kan rin ang em emin a nghawng nasa lo," tiin, 7.5% vel bakin a tlahniam loa an hriat thu a sawi.

United Penticostal Church (North East India) chuan, inkhàrkhip vangin Pathian ram thilpek an dawn ṭhat loh phah tih an sawi. UPC (NEI) general treasurer Rev. Zohmingthanzama chuan, "Lockdown vang hian kan tlahniam viau chuan kan hria a, kan inkhawm loh hian kan sum dawn a tlem phah bawk," a ti. Rev. Zohmingthanzama chuan, an kohhran kal dan chu kohhran lian dangte ang a nih loh avangin district hrang hrangah chhût kim vek a ngai a, an dinhmun dik tak sawi a harsa rih tih a sawi a; thla thum dan zelah Pathian ram thilpek an khâr ṭhin thu te, kum­inah cheng nuai 10 velin an tlem tih an hriat theih tawh thute a sawi bawk. UPC (NEI)-ah hian Mizoramah district panga leh North East-ah 12 a awm a; kum hmasa lamah chuan Aizawl East district, North Mizoram district leh Lunglei district-ah cheng nuai 130 vel zel leh Lawngtlai leh Siaha district-ah nuai 60 vel ve ve an dawng ṭhin a ni.

Mizoram UPC general superintendent Rev. C Lalremsanga chuan Vanglaini palai zawhna chhángin, inkhàrkhip vangin an sum hmuh a kiam phah lo tih a sawi. Rev. C Lalremsanga chuan, sum hmuh kawngah harsatna em em an tâwk lo tih sawiin, "Sawma pakhat bika kan budget phei chu 52% vel a lut tawh. Mission rawngbawlna lam pawh a pangngai rengin kalpui a ni a, 48% vel budget a lut tawh bawk. Inkhawm theih a nih loh miau avangin kan kohhran hnuaia department zingah chuan sunday school hi a tuar ber chu an ni mai a, hei hi chu dan theih a ni lo," a ti. Mizoram UPC kohhranin hma­chhawp langsar an neih zingah chuan General Headquarters office thar sa tura an hmalakna chu fimkhur thilah an châwl rih a, boruak awm zel dan an thlithlai phawt thu Rev. C Lalremsanga chuan a sawi bawk.

Vanglaini palai zawhna chhang 7th Day Adventist-a Stewardship enkawltu Pastor Thangliana Fanai chuan Covid-19 vangin an kohhrana sum lut a tlem phah thu a sawi a, "15% aṭanga 20% velin sum lut a tlem phah. Hei vang hian kawng hrang hrangin kan inhrek phah nasa hle," a ti.