FCI-in kudam sawnna tur la hmu lo ; Mizoram buhfai kan lei lo - Supply deptt.

Food Corporation of India (FCI) chuan, Ramrikawna an kudam sawnna tur ram an duh ang an la hmu thei lo. Hetih lai hian, Food, Civil Supply & Consu­mer Affairs (FCSCA) hotute chuan Mizoram aṭanga buhfai thar chhuah an lei ngai loh thu an sawi.

Consultative Committee on Food Corporation of India, Mizoram chairman Ronald Sapa Tlau, Rajya Sabha MP chuan nimin khan Aijal Club-ah thuthar thehdarhtute a kâwm a; Ramrikawna FCI kudam sawnna turin ram an la hmuh loh thu sawiin, "Ramrikawn kudam sawnna tur hian lu a tihai khawp mai a, land acquisition atan sum tam tak a ngai ṭhin," a ti.

Ronald Sapa sawi danin, kudam sawnna tur hian rel chawlhhmun aṭanga hla lo duh a ni a, rel aṭanga kudama phurh nghal mai thei a nih chuan senso a tlem dawn a ni.

Nghalchawm ramah hmun ṭha hmuh a ni a, mahse, a panna tur siam nan sum tam tak sênga lei dawh a ngai dawn avangin tih chi a ni lo. Suaka Cricket Stadium sira ram hmuh chu a bul hnaiah picnic spot a awm avangin kudam dah a nih chuan a hnawk turah an ngai. Tunah hian Sihhmuiah mimal ram pakhat an enfiah mek bawk.

Ramrikawna FCI kudam sawn chu state sorkar pawhin a vei hle nia sawiin Ronald Sapa chuan, "Kudam sawn a nih theihna atan hian hmalak char char a ni," a ti.

Ronald Sapa chuan, tun dinhmunah Mizoram sorkarin FCI aṭangin Food Security Act (FCA) atan bak buhfai lei a nih loh thu sawiin, "FCA atan hian thla tin quintal 5,47,983 an lei ṭhin," a ti a; buhfai mamawh bak zawng chu Mizoram sorkarin MIZOFED kaltlangin an lei thu a sawi.

Zawhna chhangin MP chuan, MIZOFED-in eng emaw harsatna a tawh palh pawhin FCI-in buhfai lei tur a neih thu a sawi a, "Tun dinhmunah metric ton 9498.217 chhêk khawl a ni a, thla eng emaw zat chu a daih dawn. Hralhna awm loh vanga kudama dah rei deuh a nih pawhin FCI dan hnuaiah man tlawm zawka hralh theih dan a awm," a ti.

Ronald Sapa ṭawiawmtu FCSCA hotute chuan zawhna chhangin, Mizorama thar chhuah buhfai an la lei ngai loh thu an sawi a, "Agriculture department hotute nen kan sawiho tawh a, Mizorama thar chhuah lei tur an neih tak tak leh tak tak loh kan zawhin an zuam lo," an ti. Agriculture department record-a a lan dan chuan, kum tin Mizoramah buh eng emaw zat thar ṭhin a ni.

FCSCA hotute sawi danin, ramria buh hmun tam tak chu hnam dangin an enkawl a ni a, Mizoram aṭanga thar chhuah ni tho mah se, state dangah hralh ṭhin.

MIZOFED-in buhfai an supply ṭhin chu uluk taka an endik ṭhin thu sawiin FCSCA hotute chuan, "An hnenah pawh lehkha kan ziak tawh. A ip thlengin kan sawisel a, mahse, ip ṭha zawk hmang tur chuan qtl. khatah Rs. 100 vela tihto a ngai dawn," an ti.