Larsapin pi leh pute sûlhnu a tlawh

Governor Lt. Gen. Nirbhay Sharma chuan, February 28, 2017 Mizoram khawchhak tlangdunga pi leh pute sûlhnu leh hmun hluite a fang kual.

Khaw hrang hranga mipuite'n an lo hmuahnaah thu sawiin Larsap chuan, "Mizoram hi hmun nuam tak, mipui rilru inhawn zauna hmun leh sik leh sa pawh nuam tawk tak a ni. Mizo mipuite zingah theihna leh thiamna sang tak ka hmu a; ziak leh chhiar thiamna lamah pawh India rama a sang ber pawl in ni a, nunphung dik in zawh chuan Mizote hi sang takah in thleng thei a ni," a ti.

Governor chuan, Mizorama zûk leh hmuam, zu, damdawi leh chhan hrang hrang avanga cancer leh HIV/AIDS natnate a hluar phah nasa chu pawi a tih thu a sawi a; mipuite chu mahni inthunun chunga nun kawng dik zawh turin a sáwm.

Pipu sûlhnu humhalhtu aiawhte chuan Governor-in Mizo pipute sûlhnu a ngaih pawimawhsak chu lawmawm an tih thu an hrilh a; pi leh pute sûlhnu humhalhna kawnga harsatna an neih leh ṭanpui an ngaihnate Governor hnenah ziakin an thlen.

Governor hian Dungtlang, Vangchhia leh Khawbunga pi leh pute sûlhnu hrang hrangte a fang kual a ni.