Nursing directorate siam tum a ni - Health Minister

Health minister Lal Thanzara chuan, Mizoram sorkarin Health department aṭangin Nursing directorate hran siam a tum a, hmalak mek a nih thu a sawi.

Trained Nurses' Association of India (TNAI) Mizoram Branch-in nimina Synod Conference Centre-a Biennial Conference vawi 18-na an neih a hmanpuinaah Health Minister chuan, Nursing directorate siam tum a nih thu a sawi a, "Secretariat lamin an buaipui mek a, DPR pawh DPAR lamah an thehlut tawh. Nursing directorate hran nei turin hma kan la dawn a ni," a ti.

Lal Thanzara chuan, nurse hna chu hna zahawm a ni tih sawiin, "Mi dangte tana malsawmna thlen a, mahni indahṭhaa mi dangte

ṭanpui a, mi dangte enkawl a, mahni aia damlo leh enkawlna mamawhte dah hmasakna hna a ni," a ti a; nurse-te chu damlo chau leh beidawngte hnena beiseina thlentu leh hna ropui tak thawk an nih thu a hrilh.

Kohhran huang chhunga rawngbawlna ni loah chuan nurse hna chu Pathian rawngbawlna remchang ber nia a hriat thu sawiin, Thanzara chuan, "Hetianga Pathian rawngbawlna remchang in nei hi in vannei hle a ni," a ti a; inpe lehzuala rawngbawl turin a ngen.

Lal Thanzara chuan, India ram chhung leh páwnah Mizo nurse-te'n fak an hlawh a, India rama damdawi-in liante'n Mizo nurse-te an duh thu an sawi ṭhin chu lawmawm a tih thu sawiin, "Mizo nih tinuamtu leh Mizo tihmingṭhatu in ni a, chutiang chu nih in tum zel dawn nia," a ti a; hnam dang zinga thawk Mizo nurse-te chu Kristian an nih avangin sakhaw dang betu nurse-te aiin an damlote enkawlna ṭha zawk pe turin a fuih.

Nurse tam zawkin dawhthei taka damlote an enkawl laiin, nurse tlemtê, damlote chunga ṭawngkam, duhtui lo an awm leh zauh ṭhin tih sawiin Minister chuan, "Hengte vang hian department leh damdawi-in pumpuiin hmingchhiat leh sawisel kan tâwk ṭhin hi a pawi ka ti. Mi ṭhenkhat sum duh vanga nurse tih âwm loh tak ti an awm ṭhin nia sawi te, duty laia nachhâwkna ruih theih lo ei ve mai chingte an awm nia sawite hi tak tak a nih chuan kan hna zahawmna nen a inhmeh lo tih hria a, kan sim vat a ṭha ang," a ti.

Health Minister chuan, nurse-te chu hmel hlim leh ṭawngkam ṭha taka damlote enkawl zel tur leh, nurse thutiam an chham tawhte chu an thinlungah vawng reng turin a chah a; tun hnaia staff nurse lak tumna tlawh ta rih chu chinfel tum mek a nih thu a sawi bawk.

TNAI Mizoram Conference-ah hian thupui chu 'Nurses: A voice to lead - achieving sustainable development goals' tih a ni a, thupui hi Lalchhanhimi’n a sawi hawng a; an president Lalfamkimi’n an pawl hmalakna tlangpui a sawi bawk. Conference hi vawiinah chhunzawm a ni dawn a, legal awareness leh life skill training an nei ang.

TNAI Mizoram Branch-ah hian tun dinhmunah member 1,876 an awm mek a ni.