KHAWTHLIR

Ash Wednesday
Catholic Kohhrante chuan nimin khan Ash Wednesday (Vut inhnawih ni) an hmang. Vut inhnawih ni hi Mizorama Catholic Kohhran hrang hrangte'n zing karah an Parish ṭheuhah urhsûn takin an hmang a ni.

MUP lawm
Mizoram Upa Pawl (MUP) chuan thuchhuah siamin, Cabinet meeting-in hmeichhia kum 60 chin chung lam tan Mizoram State Transport bus-ah chuan man chawi loa chuan a phalsak chu lawmawm an tih thu an tarlang.

Police training
Mizoram Police headquarters-a Training Branch chuan, nimin khan PHQ Training Hall-ah Police sub-inspector leh inspector-te tan ruihhlo man chungchanga dan leh hraite zirna, 'Investigation of NDPS Act cases’ an buatsaih a; Anti Corruption Bureau director LH Shanliana'n a hawng. Training-ah hian Mizoram hmun hrang hranga police officer 21 an tel a, vawiinah chhunzawm a ni ang.

Duhsakna hlan
Mizo Students Union chuan thuchhuah siamin, MBSE hnuaia Higher Secondary School Leaving Certificate Examination hmachhawn mek zirlaite leh High School Leaving Certificate Examination hmachhawn mai tur zirlaite chu ṭha taka an exam theih nan duhsakna an hlan.

Free clinic
ICFAI University-a Department of Social Work leh Chief Medical Officer, Aizawl West District hnuaia District Early Intervention Centre ṭangkawpte chuan nimin khan Lamchhip khuaah a thlawna inentirna, Free Health Clinic an buatsaih a; mi 500 an inentir a, a thlawnin an mamawh ang damdawi an sem nghal.

Zampuimanga chanchin lehkhabu
Pasalṭha Zampuimanga chanchin ziahna Lehkhabu, C Lalaudinga buatsaih chu nimin khan Finance minister Lalsawta’n Chanmari YMA Hall-ah a tlangzarh. Zampuimanga hi Zampui, Tripura-ah kum 1801 velah a piang a, kum 1820 velah Hualngohmunah awm ṭanin, kum 1825 velah Lalsavunga khua Aizawlah a awm ṭan a ni.