MNF-in independence puan champha hmang

MNF party chuan, nimin khan March 1, 1966-a Mizoram independence an puan champha vawi 50-na kum khat chhung an hman khârna inkhawm an buatsaih a; MNF president Zoramthanga'n thu sawiin, Mizo Hnam Rûna Mizo zawng zawng láwi khawm turin a sáwm.

MNF-in independence an puan kum 50-na, golden jubilee hi March 1, 2016-ah hman ṭan a ni a, nimin khan an khâr a ni. A khârna hun hi Aizawl bakah district khawpui ṭhenkhatah hman a ni a, MNF hmunpuia hruaitu ṭhenkhatte'n an hmanpui.

Aizawla hun an hmanah Zoramthanga chuan thuchah sawiin, "March 1, 1966 aṭanga kum 50 chhunga harsatna chi hrang hrang lo tuar a, hliama lo awm leh rilru natna la nei zawng zawngte pawh Mizo Hnam Rûnah i láwi khawm leh vek ang u," a ti a; MNF aṭanga party danga lo awm tawhte leh Mizo mipui zawng zawng Mizo Hnam Rûna láwi turin a sawm a ni.

MNF President chuan, Congress party-in kum 50 chhung India rama ro an rêlna a tawp hnuah retheihna bak an hnutchhiah lo nia sawiin, "Mipui an harh tawh a, tunah chuan an lo hnâwl ta. Mizoramah an pi leh pute ṭawng zirtir tura an lak mi 1,305 pawh thla 10 hlawh an pe thei tawh lo a, chuti chungin an hotupa ber chuan Delhi kal a la tum chuang lo a ni," a ti.

MNF senior vice president Tawnluia chuan, "Mite’n zalenna sual bànsan angin min sawi ṭhin mah se, kan la bansan lo a, Mizoramin zalenna a neih hma chu kan bei zel dawn A hmanrua leh tih dan chu eng pawh ni se, silai cháwiin kan bei leh ang tihna a ni lo," a ti a; Mizoramin zalenna a neih hma chu an bei chhunzawm zel dawn tih a sawi.

MNF president hmasa ber Laldenga (L) nupui Lalbiakdiki pawhin thu sawiin, Laldenga’n ram leh hnam tana a lo thawh tawh dante a sawi a, "Mizo ṭhalai zawng zawngte he ram a him a, hma a sawn zel theih nan hnama chiang thar turin ka ngen a, ram leh hnam humhalh zel turin an theihna hlan turin ka ngen a ni," a ti.

Lungleiah chuan Mizo Hnam Runah independence puan champha an hmang a, MNF hmunpui aṭangin treasurer Vanlalzawma, MLA-in a hmanpui.

Vanlalzawma chuan, Mizoramin India laka zalenna a sual chu MNF tan mai ni lo, Mizo mipui tan a ni tih a sawi a; hnam sipaia chhuakte chu an chhungte remtihnaa chhuak an awm a rin loh thu sawiin, "Mizoram leh hnam hmangaihna thinlung puin, a ṭul chuan ram tan 'Ka nunna pawhin tuar dawn mahse' tia pên chhuak an ni," a ti.