Chapchar Kût puala buatsaihte hawng

March 3, Zirtawpnia Chapchar Kût hman tur pualin inbuatsaihna hrang hrang neih a ni a, nimin khan kût puala buatsaih Chapchar Kut Flower Show & Fair, Art Exhi-bition, Food Fest leh Handloom Festival-te chu hawn a ni.

Food Fest leh Handloom Festival hi Lammual sirah buatsaih a ni a, Commerce & Industries minister H Rohluna'n a hawng. Handloom Festival-ah hian thawmhnaw dawr 10 hawn a ni a, Food Fest-ah ei tur hrang hrang zawrhna dawr 18 hawn a ni thung.

Flower Show & Fair hi Treasury Square-a Transport department building-ah buatsaih niin, Mizoram State Women Commission chairperson Vanlalawmpuii Chawngthu-in a hawng. Fair hi Mizoram Florist Association buatsaih niin, dawr 45 hawn a ni a, ni thum chhung a awh ang.

Art Exhibition chu Art & Culture leh IPR department leh Mizoram Art Development Society (MADS)-ten Aizawl Art Gallery-ah an buatsaih a, IPR director Lalnithangi'n a hawng. Exhibition-ah hian MADS member 28-te'n an kut­chhuak 62 an pho chhuak a ni.