Prayer Mountain-ah Ni 40 chaw ngheia ṭawngṭai hun ṭan

Salvation Army-te chuan, Salvation Army India Eastern Territory Centenary Celebrations Prayer & Counselling Sub-Committee huaihawtin nimin aṭang khan Prayer Mountain, Hangi Lunglen Tlangah ni 40 leh zan 40 chawngheia ṭawngṭai hun an hmang ṭan.

Chawngheia ṭawngṭaina hun hi nimin chhun dar 1 khan hawn a ni a, SA chief secretary Lt.Col. Davidson Varghese-in Pa­thian hnena hlanin a hawng. Ṭawngṭai hi March 1 aṭanga April 9, 2017 thleng neih tur a ni a; ni tin SA India Eastern Territory-a corps leh society dintu thi tawhte hriatrengna hun leh an puala inkhawm tawi hman ṭhin a ni dawn.

Chawngheia ṭawngtaina thupui tur zingah - Mizorama kohhran hrang hrang inpumkhat nan te, Mizorama kohhran tinah harhna a thlen theih nan te, ruihhlo leh mipat hmeichhiat­na vanga tuartute'n nun danglam an neih nan te, ram hruaitu leh sorkar mi pawimawhte'n dik taka ro an rêl theih nan, tihte a tel. Ṭawngṭaia tel tur hian mi tin an sáwm a ni.