Lunglei district-a Mission Indradhanush sawiho

Lunglei District Task Force for Immunization Committee chu nimin khan Lunglei DC K Lal­rohlua kaihhruaiin a pisaah an ṭhukhawm a; Lunglei district-a Mission Indradhanush (MI) phase-4 round-1 neih dan an thlirho bakah, round-2 kalpui tura hmachhawpte an sawiho.

District immunisation officer Dr Lalawmpuia Chhangte-in report a pek danin, MI phase-4 round-1 chu February 7, 2017-ah zawh a ni a, round-2 chu March 7 aṭanga kalpui ṭan tur a ni.

Bunghmun PHC hnuai­a naupang kum hnih hnuai lam 41 leh nu nau pai 20-te phase-4 round-1 chhungin hri danna (vaccine) pek tum an ni a, mahse, harsatna hrang hrang avangin 87% leh 60% chauh tihhlawtlin theih a ni. Round 2-ah naupang kum hnih hnuai lam 40 leh nu nau pai 16-te vaccine pek tum a ni.