Mizorama Covid-19 vei 227 zingah vei tawh lo mi 151, vei mek mi 76

July 11, Inrinnia Lunglei Civil Hospital (LCH) laboratory-ah TrueNAT kháwl hmangin Covid-19 vei mi pakhat hmuh chhuah belh a ni a; Zoram Medical College (ZMC) laboratory-ah erawh chuan July 10 leh 11-ah vei hmuh chhuah an awm lo. Mizorama Covid-19 vei hmuh chhuah tawh zawng zawng chu mi 227 an ni a, mi 151 chu negative leh tawhin, vei mek mi 76 an awm.

Inrinnia Covid-19 vei hmuh chhuah hi mipa kum 34 mi, Meltea Border Security Force (BSF) chaw chhumtu (cook) a ni a; state pawn aṭanga rawn lut thar ni loin, BSF sipai dang aṭanga kai a nih thu leh khung hran lai mek a nih thu, sorkar thuchhuah chuan a tarlang. Nimin tlai dar 5 thleng­a Mizorama Co­vid-19 vei hmuhchhuah tawh chu mi 227 an ni a, mipa 138 leh hmei­chhia 89 an ni. Vei zinga mi 151 (66.52%) chuan an vei tawh lo (negative tawh) tih finfiah a ni tawh a, negative tawh zinga mi 150 chhuak tawhin, mi pakhat - Champhai district mi erawh chu Dedicated Covid Health centre (DCHC)-ah a la awm. Hripui vei mek zat chu mi 76 (33.48%) an ni.

July 11, Inrinni vek khan Covid-19 vei dam tawh mi pasarih chuan enkawl an nihna hmun an chhuahsan a, mipa pakhat leh hmeichhia paruk an ni. An zinga mi pali chu Mamit district mi, hmeichhia vek niin, DCHC/CCC aṭang­in chhuahtir an ni a; heti hian Mamit district-a Covid-19 vei mi 20-te damin an chhuak kim ta. Inrinnia chhuahtir mi pathum erawh chu chhung­kua (nupa leh an fanu kum 3 mi) an ni a, State Referral Hospital (SRH) aṭangin chhuahtir an ni. 

Inrinnia LCH labo­ra­tory-a mi 28 swab sam­ple endik zinga pakhatin hripui a vei laiin, mi 27 erawh an fihlim a; endikte chu Lunglei khawpui chhung veng hrang hrang­a mite bakah, Serte, Sertlangpui, South Vanlaiphai leh Haulawng mite an ni. Covid-19 ne­gative zing­ah BSF sipai dang pali leh Covid-19 positive-te bul hnaia awm mi 23 an tel a, BSF sipaite’n an tlawh PC Pharmacy-a inentirte an tel bawk. ZMC Covid-19 Labo­ratory-ah erawh chuan July 10-11 khan hripui vei hmuh chhuah an awm lo. July 10 khan mi 295 endik a ni a; ZMC-a awm sa mi 15, Aizawl district mi 174, Kolasib district mi 61, Saitual district mi 23, Mamit district mi 13, Lawngtlai district mi pakhat leh Assam lam mi pariat an ni. Endik zingah hian Durtlang, Falkland Veng leh Lengtea BSF mi 66 an tel.

ZMC-ah vek hian July 11 khan mi 271 (M-180, H-91) endik an ni a, Aizawl district mi 94, Lunglei district mi 70, Champhai district mi 19, Serchhip district mi 67 leh Lawngtlai district mi 21 an ni. Lungleia BSF sipai Covid-19 positive-te bul hnaia awm mi 70 an tel bawk.